ہالی ووڈ ستاروں کو کروڑوں ڈالر کی غیر قانونی ادائیگی کی گئی، ٹرمپ نے کملا ہیرس پر مقدمہ چلانے کا مطالبہ کیا

امریکہ کے صدر ڈونالڈ ٹرمپ نے ایک بار پھر سیاسی ہنگامہ برپا کر دیا ہے۔ اس مرتبہ انہوں نے سابق امریکی نائب صدر کملا ہیرس اور کئی مشہور شخصیتوں کو نشانہ بنایا ہے۔ ٹرمپ نے الزام لگایا ہے کہ 2024 کے صدارتی انتخاب کے دوران کملا ہیرس اور ڈیموکریٹک پارٹی نے مشہور ستاروں کو تشہیر کے لیے کروڑوں ڈالرز کی ادائیگی کی۔ انہوں نے اسے پوری طرح سے غیر قانونی بتاتے ہوئے قصورواروں کے خلاف مقدمہ چلانے کا مطالبہ کیا ہے۔

ٹرمپ نے اپنے سوشل میڈیا سائٹ ’ٹروتھ اسپیشل‘ پر پوسٹ جاری کرتے ہوئے دعویٰ کیا کہ ڈیموکریٹس نے گلوکارہ بیونس کو تشہیر کے بدلے 1.1 کروڑ ڈالر، ٹیلی ویژن ہوسٹ اوپرا ونفرے کو 30 لاکھ ڈالر اور شہری حقوق کے کارکن الشارپٹن کو 6 لاکھ ڈالر دیے۔ انہوں نے کہا کہ ان ہستیوں نے کوئی ٹھوس کام نہیں کیا اور ان کی حمایت بھی حقیقی نہیں تھی۔ ٹرمپ نے کہا کہ یہ سب تشہیر کے لیے ادائیگی تھی اور یہ پوری طرح سے غیر قانونی ہے۔

ٹرمپ نے لکھا کہ تصور کیجئے کہ اگر رہنما حمایت خریدنے لگے تو کیا ہوگا؟ بدامنی پھیلے گی۔ کملا اور دیگر جنہوں نے بھی ادائیگی کی یا پیسے لیے، انہوں نے قانون توڑا ہے اور انہیں سزا ملنی چاہیے۔ ٹرمپ کا الزام ہے کہ یہ ادائیگی تشہیر کے خرچ میں بھی صحیح طریقے سے نہیں درج کی گئی اور ریکارڈ میں گڑبڑی کی گئی ہے۔

ٹرمپ کے اس نئے حملے کے پیچھے ان کا یہ بھی دعویٰ ہے کہ ڈیموکریٹس ان کی توجہ ہٹانے کی کوشش کر رہا ہے۔ انہوں نے جیفری ایپسٹین کیس سے جڑی جانچ کو ’سیاسی سازش‘ بتایا اور کہا یہ ان کے بہترین چھ مہینے کے انتظامی کاموں سے لوگوں کی توجہ ہٹانے کا منصوبہ ہے۔ ٹرمپ نے اسے جیفری ایپسٹین گھوٹالہ قرار دیا ہے۔

 ٹرمپ کے الزامات نے امریکی سیاست میں حمایت کو لے کر ایک بڑی بحث چھیڑ دی ہے۔ کیا کسی سے حمایت کے بدلے ادائیگی کرنا جرم ہے؟ یہ سوال اب قانون اور سیاست دونوں کے دائرے میں بحث کا موضوع بن گیا ہے۔ اگر ٹرمپ کے دعوے صحیح ثابت ہوتے ہیں، تو ڈیموکریٹک پارٹی اور کئی نامی چہروں کے لیے مشکلیں کھڑی ہو سکتی ہیں۔ وہیں ناقدین کا کہنا ہے کہ ٹرمپ خود اپنے اوپر چل رہی جانچوں سے دھیان ہٹانے کی کوشش کر رہے ہیں۔