ایتھوپیا نے وزیر اعظم مودی کو اپنے سب سے بڑے اعزاز سے نوازا

افریقی براعظم میں وزیر اعظم نریندر مودی کی عالمی مقبولیت ایک بار پھر واضح ہوگئی۔ منگل یعنی 16 دسمبر کو،وزیر اعظم  مودی کو ایتھوپیا کے اعلیٰ ترین شہری اعزاز، "عظیم اعزاز نشان" سے نوازا گیا۔ ایتھوپیا کے اس اعزاز کے ساتھ، وزیر اعظم مودی کو اب دنیا کے مختلف ممالک سے تقریباً 28 اعلیٰ ترین شہری اعزازات ملے ہیں۔

ایتھوپیا کا اعلیٰ ترین شہری اعزاز حاصل کرنے کے بعد  وزیر اعظم  مودی نے کہا کہ یہ  اعزاز  تمام ہندوستانیو ں کا ہے۔ وزیر اعظم مودی نے کہا، "میں تمام ہندوستانیوں کی طرف سے انتہائی عاجزی اور شکرگزار کے ساتھ اس اعزاز کو قبول کرتا ہوں۔ یہ اعزاز ان ان گنت ہندوستانیوں کا ہے جنہوں نے ہماری شراکت داری کو شکل دی۔ ‘‘

اردن کے بعد دو روزہ ایتھوپیا کے دورے پر منگل کو یہاں پہنچے وزیراعظم ہند نریندر مودی نے ایتھوپیا کے وزیر اعظم ڈاکٹر ابی احمد علی کے ساتھ وفود کی سطح کی بات چیت کے دوران یہ بات کہی۔ریندر مودی نے کہا کہ ہندوستان اور ایتھوپیا کے درمیان ہزاروں برسوں سے مسلسل رابطوں اور باہمی تبادلوں کے رشتے رہے ہیں۔ انہوں نے کہا کہ متعدد زبانوں والے ممالک کی حیثیت سے دونوں ملک وحدت میں کثرت کی مثال ہیں اور دونوں ہی امن اور انسانیت کے تئیں پختہ عزم رکھنے والی جمہوری طاقتیں ہیں۔

وزیر اعظم نے کہا کہ ہندوستان اور ایتھوپیا گلوبل ساؤتھ کے ہم سفر بھی ہیں اور شراکت دار بھی۔ انہوں نے کہا کہ بین الاقوامی فورمز پر بھی دونوں ممالک کندھے سے کندھا ملا کر کھڑے رہے ہیں۔ انہوں نے کہا کہ افریقی یونین کا صدر دفتر ایتھوپیا میں ہونا، ایتھوپیا کو افریقی سفارت کاری کا مرکزی محور بناتا ہے۔ انہوں نے مزید کہا کہ ایک جامع عالمی وژن سے متاثر ہو کر ہندوستان نے اس بات کو یقینی بنایا کہ 2023 میں افریقی یونین کو جی-20 کی رکنیت حاصل ہو۔