میکسیکو میں خوفناک حادثہ، ایمرجنسی لینڈگ کی کوشش میں عمارت سے ٹکرایا پرائیویٹ جیٹ، 10 لوگوں کی موت

وسطی میکسیکو میں ایک بڑا طیارہ حادثہ پیش آیا ہے۔ ایمرجنسی لینڈنگ کی کوشش کر رہے ایک چھوٹا پرائیویٹ طیارہ حادثہ کا شکار ہو گیا، جس کے سبب کم از کم 10 لوگوں کی موت ہو گئی ہے۔ حادثہ کے بعد علاقے میں افراتفری مچ گئی اور انتظامیہ نے فوری راحت اور بچاؤ کا کام شروع کر دیا۔ ’میکسیکو اسٹیٹ سول پروٹیکشن کوآرڈینیٹر ایڈرن ہرنانڈیز‘ کے مطابق یہ حادثہ سان میٹیو آٹینکو میں پیش آیا، جو ٹولوکا ایئرپورٹ سے تقریباً 5 کلومیٹر اور میکسیکو سٹی سے تقریباً 50 کلومیٹر مغرب میں ایک صنعتی علاقہ ہے۔ حادثہ کا شکار طیارہ اکاپلکو سے آ رہا تھا۔

میڈیا رپورٹس کے مطابق طیارہ ایک نزدیکی فٹ بال میدان پر ایمرجنسی لینڈنگ کی کوشش کر رہا تھا۔ اسی دوران وہ پاس میں واقع ایک کمرشیل عمارت کی لوہے کی چھت سے ٹکرا گیا۔ ٹکر کے بعد طیارہ میں زبردست آگ لگ گئی، جس نے آس پاس کے علاقے کو اپنی زد میں لے لیا۔ ’ہرنانڈیز‘ نے بتایا کہ طیارہ میں کل 8 مسافر اور 2 عملے کے ارکان سوار تھے۔ حالانکہ حادثے کے کئی گھنٹے بعد تک صرف 7 لاشیں ہی برآمد ہو سکیں۔ دیگر لوگوں کی تلاش اور شناخت کا عمل جاری ہے۔

حادثہ کے فوراً بعد فائر بریگیڈ اور امدادی ٹیموں نے موقع پر پہنچ کر آگ پر قابو پا لیا۔ سان میٹیو اٹینکو کی میئر اینا منیز نے ’میلینیو ٹیلی ویژن‘ سے بات چیت میں بتایا کہ ’’آگ کی شدت کو دیکھتے ہوئے آس پا س کے تقریباً 130 لوگوں کو محفوظ مقامات پر پہنچایا گیا۔‘‘ واضح رہے کہ انتظامیہ نے احتیاطاً پورے علاقے کو گھیر لیا ہے۔ مقامی لوگوں میں دہشت کا ماحول ہے اور جائے وقوعہ کے آس پاس سیکورٹی بڑھا دی گئی ہے۔ افسران کا کہنا ہے کہ حادثے کی وجوہات کی تحقیقات شروع کر دی گئی ہے۔ طیارہ حادثے کی اصل وجہ تکنیکی خرابی تھی یا کوئی اور وجہ یہ تحقیقات مکمل ہونے کے بعد ہی واضح ہوسکے گی۔