سویڈن کے راجہ اور رانی نے کیا تاریخی جامع مسجد اور لال قلع کا دورہ

سویڈن کے راجہ کارل سولہویں گستاف اور رانی سلویا پیر کے روز دہلی پہنچے اور تاریخی جامع مسجد کی سیر کی۔ ان کے ساتھ سویڈن سے آئے وفد نے بھی جامع مسجد کا نظارہ کیا۔ اس وفد میں سویڈن کے وزیر خارجہ، وزیر صنعت اور دیگر نمائندے بھی شامل تھے۔ ہندوستان کے مشہور و معروف مورخ سہیل ہاشمی نے راجہ گستاف اور رانی سلویا کو جامع مسجد سے جڑی ہوئی تاریخ سے روشناس کرایا۔ اس موقع پر سید شابان بخاری بھی موجود تھے جنھوں نے مہمانان کو بتایا کہ جامع مسجد ایک کمیونٹی سنٹر کی نوعیت رکھتی ہے۔

راجہ گستاف اور رانی سلویا نے لال قلع کی بھی سیر کی اور یہاں کی خوبصورت دیواروں اور دیدہ زیب طرز تعمیر کی تعریف کی۔ لال قلع میں سویڈش وفد نے کافی وقت گزارا۔ پانچ دن کے دورہ پر آئے گستاف اور ان کی بیگم کئی مزید تاریخی مقامات کا دورہ کرنے کا ارادہ رکھتے ہیں۔

اس سے قبل آج صبح وزیر اعظم نریندر مودی نے گستاف اور سلویا کا استقبال حیدر آباد ہاؤس میں کیا تھا۔ بعد ازاں سویڈن سے آئے اس وفد نے راشٹرپتی بھون کا بھی دورہ کیا جہاں ان کا استقبال صدر جمہوریہ رام ناتھ کووند نے کیا۔ ان سبھی مواقع کی کئی تصویریں سوشل میڈیا پر وائرل ہو رہی ہیں۔ گستاف اور سلویا کی وہ تصویر بھی سوشل میڈیا پر وائرل ہو رہی ہے جس میں وہ راج گھاٹ پر ہاتھ جوڑ کر کھڑے ہیں۔