حمل کے دوران پیراسیٹامول کا استعمال محفوظ، آٹزم کا کوئی خطرہ نہیں، نئی تحقیق نے ٹرمپ کا دعویٰ کیا خارج

حمل کے دوران پیراسیٹامول کے استعمال کے متعلق ایک نئی تحقیق سامنے آئی ہے۔ ایک نئی بین الاقوامی تحقیق کے مطابق دورانِ حمل پیراسیٹامول لینے سے بچوں میں آٹزم، اے ڈی ایچ ڈی یا نشوونما سے متعلق کسی بھی قسم کے مسائل کا خطرہ نہیں بڑھتا۔ ماہرین کا کہنا ہے کہ حاملہ خواتین کو اس حوالے سے مطمئن رہنا چاہیے۔ یہ رپورٹ امریکی صدر ڈونالڈ ٹرمپ کے کچھ سال قبل دیے گئے متنازعہ بیانوں سے بالکل برعکس ہے، جن میں انہوں نے پیراسیٹامول کو اچھا نہیں بتایا تھا۔

واضح رہے کہ گزشتہ سال امریکی صدر ڈونالڈ ٹرمپ اور ان کی انتظامیہ نے دعویٰ کیا تھا کہ دورانِ حمل پیراسیٹامول (امریکہ میں جسے ایسیٹامنفین یا ٹائلینول کہا جاتا ہے) کا استعمال کرنے سے بچوں میں آٹزم ہو سکتا ہے۔ ٹرمپ نے یہاں تک کہا تھا کہ حاملہ خواتین کو یہ دوا لینے سے بچنا چاہیے۔ ان کے بیانوں پر پوری دنیا میں ڈاکٹروں اور طبی تنظیموں کی جانب سے تنقید کی گئی۔ ماہرین کا کہنا ہے کہ اس سے خواتین میں بے وجہ ڈر پھیلا اور اسی وہم کو دور کرنے کے لیے یہ نئی تحقیق ضروری ہو گئی۔

یہ نئی تحقیق معروف طبی جریدے ’دی لینسٹ‘ میں شائع ہوئی ہے۔ اس میں دورانِ حمل پیراسیٹامول کے استعمال سے متعلق 43 بڑے اور قابل اعتماد مطالعے شامل تھے۔ ان مطالعوں میں لاکھوں خواتین اور ان کے بچوں کے اعداد و شمار دیکھے گئے۔ خاص بات یہ رہی کہ تحقیق کے دوران ایسے معاملوں کا موازنہ کیا گیا، جہاں ایک ہی خاندان میں ایک حمل کے دوران دوا لی گئی اور دوسری میں نہیں۔ اس سے جینز، خاندانی ماحول اور دیگر وجوہات کا اثر تقریباً ختم ہو گیا۔ مطالعہ میں کہا گیا ہے کہ پیراسیٹامول اور آٹیزم کے درمیان کوئی تعلق نہیں ملا۔ کوئی ثبوت نہیں ہے کہ یہ دوا خطرہ میں اضافہ کرتی ہے۔ صحیح مقدار اور ڈاکٹر کے مشورہ کے مطابق لیا گیا پیراسیٹامول دوران حمل محفوظ ہے۔

واضح رہے کہ ڈاکٹروں نے یہ بھی وارننگ دی ہے کہ دورانِ حمل تیز بخار یا درد کو نظر انداز کرنا زیادہ خطرناک ہو سکتا ہے۔ اگر بخار کم نہیں کیا گی تو اس سے اسقاطِ حمل، قبل از وقت ڈیلیوری یا بچہ کے نشو نما پر اثر پڑ سکتا ہے۔ اسی وجہ سے پوری دنیا میں پیراسیٹامول کو حمل کے دوران خواتین کے لیے سب سے محفوظ درد اور بخار کی دوا مانی جاتی ہے۔ حالانکہ گزشتہ سال ہارورڈ یونیورسٹی کے ایک مطالعہ میں طویل مدت تک اور زیادہ مقدار میں پیراسیٹامول لینے کے متعلق احتیاط برتنے کی بات کہی گئی تھی۔ لیکن نئے تجزیے میں کہا گیا ہے کہ پہلے کی کئی رپورٹس میں دیگر وجوہات کو ٹھیک سے نہیں دیکھا گیا، جس کی وجہ سے غلط نتیجے نکلے۔