اب انڈیگو طیارہ میں آئی خرابی، کراچی میں ہوئی ایمرجنسی لینڈنگ

ابھی زیادہ دن نہیں ہوئے ہیں جب اسپائس جیٹ طیارے میں تکنیکی خرابی کے سبب پاکستان واقع کراچی میں ایمرجنسی لینڈنگ کرانی پڑی تھی، اور اب انڈیگو طیارہ کے ساتھ بھی کچھ ایسا ہی معاملہ سامنے آیا ہے۔ میڈیا رپورٹس کے مطابق انڈیگو فلائٹ شارجہ سے حیدر آباد جا رہی تھی، لیکن تکنیکی خرابی کے بارے میں پتہ چلتے ہی احتیاطاً اس کی ایمرجنسی لینڈنگ کراچی میں کرائی گئی۔ ابتدائی جانکاری کے مطابق تکنیکی خرابی کی اطلاع ملنے کے بعد ’کرو ممبرس‘ نے طیارہ کی ایمرجنسی لینڈنگ کرانے کا فیصلہ کیا۔ مسافروں کو اب دوسرے طیارہ سے حیدر آباد بھیجنے کی تیاری چل رہی ہے۔

اس معاملے میں انڈیگو ایئرلائنس کی طرف سے کہا گیا ہے کہ شارجہ-حیدر آباد فلائٹ کے پائلٹ کو طیارہ میں تکنیکی خرابی کی جانکاری ملی۔ اس کے بعد احتیاط کے طور پر طیارہ کو کراچی کی جانب موڑ دیا گیا۔ فی الحال مسافروں کو حیدر آباد لانے کے لیے کراچی کے لیے ایک اضافی فلائٹ کا انتظام کیا گیا ہے۔

واضح رہے کہ گزشتہ 5 جولائی کو بھی اسپائس جیٹ کے طیارہ میں خرابی آنے کے بعد کراچی میں ایمرجنسی لینڈنگ کرانی پڑی تھی۔ یہ طیارہ دہلی سے دبئی جا رہا تھا جب اس میں خرابی کا پتہ چلا۔ بعد میں اسپائس جیٹ کی دوسری فلائٹ سے مسافروں کو دبئی لے جایا گیا تھا۔ ویسے تین دن قبل یعنی 14 جولائی کو ایک انڈیگو طیارہ میں بھی خرابی کا معاملہ سامنے آیا تھا۔ جئے پور میں انڈیگو طیارہ کی ایمرجنسی لینڈنگ کرائی گئی تھی کیونکہ انجن میں وائبریشن محسوس کیا گیا تھا۔