ہندوستانی وزیر خارجہ ایس جئے شنکر نے ایرانی وزیر خارجہ سے کی بات، موجودہ حالات پر ہوا تبادلہ خیال

ایران اور اسرائیل کے درمیان جنگ بندی سے عالمی سطح پر کچھ سکون ضرور میسر ہوا ہے، لیکن یہ اندیشہ برقرار ہے کہ دونوں ممالک میں سے ایک نے بھی جنگ بندی کی خلاف ورزی کی، تو حالات پھر کشیدہ ہو سکتے ہیں۔ اس بیچ ہندوستانی وزیر خارجہ ڈاکٹر ایس جئے شنکر نے جمعرات کو ایرانی وزیر خارجہ سید عباس عراقچی سے بات چیت کی۔ اس بات چیت کی جانکاری ایس جئے شنکر نے سوشل میڈیا پلیٹ فارم ’ایکس‘ پر 27 جون کو دی۔

مرکزی وزیر خارجہ ایس جئے شنکر نے سوشل میڈیا پوسٹ کے ذریعہ بتایا کہ انھوں نے ایرانی وزیر خارجہ سید عباس سے گفتگو کے دوران موجودہ پیچیدہ حالات پر ایران کا نظریہ جانا اور ان کی سوچ کو سمجھنے کی کوشش کی۔ اس کے ساتھ ہی ہندوستانی وزیر خارجہ نے اس بات کے لیے ایران کا شکریہ ادا کیا کہ انھوں نے ہندوستانی شہریوں کو بہ حفاظت باہر نکالنے میں مدد کی۔

واضح رہے کہ ایران-اسرائیل کے درمیان 12 دنوں تک چلی جنگ کے دوران ہندوستان نے ’آپریشن سندھو‘ چلایا اور دونوں ممالک میں رہنے والے ہندوستانی شہریوں کی بہ حفاظت وطن واپسی کو یقینی بنایا۔ تازہ جانکاری کے مطابق ’آپریشن سندھو‘ کے تحت ایران سے 173 ہندوستانی کو لے کر ایک خصوصی طیارہ گزشتہ شب یریوین، آرمینیا سے نئی دہلی پہنچا۔ اس کی جانکاری دیتے ہوئے وزارت خارجہ کے ترجمان رندھیر جیسوال نے بتایا کہ اب تک 19 خصوصی طیاروں سے مجموعہ طور پر 4 ہزار 415 ہندوستانی شہریوں کو بہ حفاظت وطن واپس لایا گیا ہے۔