’جنگ میں ہندوستان کا کوئی کردار نہیں تھا‘، پاکستانی الزامات پر افغان وزیر دفاع کی دو ٹوک

افغانستان اور پاکستان کے درمیان گزشتہ کچھ دنوں میں کشیدگی کا ماحول دیکھنے کو ملا ہے۔ دونوں ممالک ایک دوسرے پر ہتھیاروں سے حملہ کر رہے تھے، لیکن اب جنگ بندی نافذ ہے۔ پاکستان نے افغانستان پر حملوں کے دوران ہندوستان کو بھی گھسیٹنے کی کوشش کی تھی۔ پاکستان نے ہندوستان پر الزام عائد کیا تھا کہ افغانستان کے حملوں میں پڑوسی ملک کا بھی ہاتھ ہے، جسے ہندوستان نے سرے سے خارج کر دیا تھا۔ اب اس معاملہ میں افغانستان کا بیان بھی سامنے آ گیا ہے۔

دراصل افغانستان سے کشیدگی کے درمیان پاکستان کے وزیر دفاع نے الزام عائد کیا تھا کہ ’’افغان طالبان ہندوستان کی جانب سے پراکسی جنگ لڑ رہا ہے۔‘‘ افغانستان کے وزیر دفاع مولی محمد یعقوب مجاہد نے ہندوستان پر عائد اس الزام کا دو ٹوک جواب دیا ہے۔ انھوں نے کہا ہے کہ ہندوستان پر پاکستان کی جانب سے عائد کردہ تمام الزامات بے بنیاد ہیں۔ ہماری پالیسی کبھی بھی اپنی سرزمین کا استعمال دوسرے ممالک کے خلاف استعمال کرنے کی نہیں رہی ہے۔ ہم ایک آزاد ملک کے طور پر ہندوستان کے ساتھ تعلق قائم رکھتے ہیں اور انہیں اپنے قومی مفادات کے دائرے میں مزید مضبوط کریں گے۔ ساتھ ہی ہم پاکستان کے ساتھ اچھے پڑوسی کے تعلقات برقرار رکھیں گے۔ ہمارا مقصد تعلقات کو استوار کرنا ہے، کشیدگی پیدا کرنا نہیں ہے۔ پاکستان کے تمام الزامات بے بنیاد، غیر معقول اور ناقابل قبول ہیں۔

وزیر دفاع نے یہ بھی کہا کہ اگر کوئی ملک افغانستان پر حملہ کرتا ہے تو وہ دلیری سے اپنی سرزمین کی حفاظت کریں گے۔ ساتھ ہی انہوں نے یاد دلایا کہ افغانیوں کا اپنے ملک کے دفاع کی ایک طویل تاریخ ہے۔ افغان لیڈر کا کہنا ہے کہ امارت اسلامیہ افغانستان کی پالیسی کسی بھی دیگر ممالک، جس میں پاکستان شامل ہے، کے خلاف مسلح گروپوں کی حمایت نہ کرنا ہے۔ وزیر دفاع نے کہا کہ اسلام آباد کے ساتھ کابل اچھے پڑوسی اور تجارتی توسیع کی بنیاد پر تعلقات قائم کرنا چاہتا ہے۔ ’الجزیرہ‘ کو دیے گئے  انٹرویو میں مجاہد نے کہا کہ افغانستان اور پاکستان کے درمیان کشیدگی کسی کے لیے بھی فائدہ مند نہیں ہے اور کابل چیلنجز کو بات چیت کے ذریعہ حل کرنے کا خواہاں ہے۔

وزیر دفاع مولی محمد یعقوب مجاہد نے کہا کہ افغانستان اور پاکستان پڑوسی ملک ہے۔ ان کے درمیان کشیدگی کا کوئی مطلب نہیں ہے۔ ان کے رشتے آپسی احترام اور اچھے پڑوسی کے اصولوں پر مبنی ہونے چاہئیں۔ دونوں ممالک کے درمیان قطر کے بعد اب ترکی میں میٹنگ ہوگی۔ مجاہد نے زور دے کر کہا کہ فریقین کو معاہدے کے ہر اصول پر قائم رہنا چاہیے۔ کابل مکمل طور سے معاہدے کی شرطوں کے تئیں پرعزم ہے اور اگر پاکستان اپنی ذمہ داریاں پوری نہیں کرتا ہے تو مشکلات میں مزید اضافے کا امکان ہے۔