کرناٹک: کابینہ میں نائب وزیر اعلی اور اسپیکر سمیت کانگریس کے 22 وزراء ہوں گے

کرناٹک میں نائب وزیر اعلی، اسپیکر اور کابینہ کو لے کر کانگریس اور جے ڈی ایس میں اتفاق رائے ہو گیا ہے۔ کماراسوامی کی کابینہ میں 22 وزراء کانگریس کے ہوں گے جبکہ 11 وزراء جے ڈی ایس کے ہوں گے۔ اس کے ساتھ اس پر اتفاق ہو گیا ہے کہ کانگریس کے دلت رہنما جی پرمیشور نائب وزیر اعلی ہوں گے اور کانگریس کے ہی کے آر رمیش اسپیکر ہوں گے۔

آج ایچ ڈی کماراسوامی حکومت حلف لے گی اور اس کی تمام تیاریاں مکمل ہو چکی ہیں۔ کماراسوامی کی کابینہ میں کل 32 وزیر ہوں گے اور یہ حکومت 24 مئی کو ایوان میں اپنی اکثریت ثابت کرے گی۔ اکثریت ثابت کرنے کے بعد ہی وزارت کے قلمدان تقسیم کئے جایئں گے۔

حکومت کی تشکیل کو لے کر منگل کی شام دونوں پارٹیوں کی اعلی قیادت نے اہم میٹنگ کی جس میں تمام پہلوؤں پر تفصیل سے غور کیا گیا۔ واضح رہے کہ کرناٹک میں حال ہی میں ہوئے اسمبلی انتخابات میں کسی بھی پارٹی کو واضح اکثریت نہیں ملی تھی اور بی جے پی کو سب سے زیادہ 104 نشستیں ملنے کی وجہ سے گورنر نے پہلے بی جے پی کو حکومت سازی کے لئے مدعو کیا تھا لیکن ان کے وزیر اعلی یدیورپا نے اکثریت ثابت کرنے سے پہلے ہی استعفی دینے کا اعلان کر دیا تھا۔ کانگریس اور جے ڈی ایس نے اتحاد بنا کر پہلے ہی اپنا دعوی پیش کر دیا تھا اس لئے گورنر نے یدیورپا کے استعفے کے بعد کماراسوامی کی قیادت میں بنے اس اتحاد کو حکومت تشکیل دینے کے لئے مدعو کیا۔ انتخابات میں بی جے پی کو104 سیٹیں، کانگریس کو 78سیٹیں اور جے ڈی ایس کو 37سیٹیں ملی تھیں۔

وا ضح رہے کسی بھی مخلوط حکومت میں اسپیکر کا عہدہ انتہائی اہم ہوتا ہے اس لئے اس اتحاد میں بڑی پارٹی ہونے کے ناطے کانگریس نے یہ عہدہ اپنے حصہ میں لیا ہے۔ ادھر حلف برداری تقریب میں شرکت کرنے کے لئے مہمان بنگلورو پہنچنےشروع ہو گئے ہیں اور ذرائع کے مطابق ملک کی بڑی سیاسی پارٹیوں کے رہنما بھی اس تقریب میں شرکت کریں گے۔ منگل کو تلنگانہ کے وزیر اعلی کے چندر شیکھر راؤ کماراسوامی سے ملنے بنگلورو پہنچے، کیونکہ بدھ کو ہونے والی حلف برداری کی تقریب میں وہ اپنی پہلے سے طے مصروفیت کی وجہ سے شرکت نہیں کر پائیں گے۔ ذرائع کے مطابق کانگریس صدر راہل گاندھی، یو پی اے چیئر پرسن سونیا گاندھی، سماجوادی پارٹی کے اکھیلیش یادو، بی ایس پی سربراہ مایاوتی، آر جے ڈی کے تیجسوی یادو، اسٹالن، کمل حسن وغیرہ حلف برداری کی تقریب میں شرکت کریں گے۔