پٹنہ کے اسپتال میں یوٹیوبر منیش کشیپ کا خاتون جو نیئر ڈاکٹر کے ساتھ جھگڑا

مشہور یوٹیوبر اور سابق بی جے پی لیڈر منیش کشیپ کا پٹنہ میڈیکل کالج اسپتال میں پیر کو جونیئر ڈاکٹروں کے ساتھ جھگڑا ہوا، جس کے بعد جونیئر ڈاکٹروں  پر الزام ہے کہ انہوں نے انہیں ایک کمرے میں یرغمال بنا کر بری طرح پیٹا۔

معلومات کے مطابق، منیش کشیپ پیر کی دوپہر ایک مریض کی التجا کرنے پٹنہ میڈیکل کالج اسپتال پہنچے تھے اور اس دوران وہاں کام کرنے والی ایک خاتون جونیئر ڈاکٹر کے ساتھ ان کا جھگڑا ہوگیا۔ اس کے بعد معاملہ بڑھنے لگا۔ بتایا جا رہا ہے کہ اسی دوران منیش کشیپ نے اس پورے معاملے کو لے کر اسپتال کے احاطے میں ایک ویڈیو بنانا شروع کر دیا، جس کے بعد جونیئر ڈاکٹر ناراض ہو گئے۔

اس کے بعد خاتون جونیئر ڈاکٹر کے ساتھ منیش کشیپ کا جھگڑے کا معاملہ بگڑتا چلا گیا اور پھر اسپتال کے جونیئر ڈاکٹروں نے منیش کشیپ کو تقریباً 3 گھنٹے تک ایک کمرے میں یرغمال بنائے رکھا۔ الزام ہے کہ اس دوران ان  کی بری طرح پٹائی بھی کی گئی جس کی قومی آواز تصدیق نہیں کرتا۔ بتایا جا رہا ہے کہ منیش کشیپ نے خاتون جونیئر ڈاکٹر کے ساتھ جس طرح بدتمیزی کی اس سے جونیئر ڈاکٹر کافی ناراض تھے۔ یہ سارا ہنگامہ اسی وجہ سے ہوا۔

اس کے بعد کسی طرح پورے معاملے کی اطلاع مقامی پولیس کو دی گئی، جس کے بعد پولیس پٹنہ میڈیکل کالج اسپتال پہنچی اور پھر کسی طرح معاملہ حل ہوا۔ ایک طرف جونیئر ڈاکٹرز الزام لگا رہے ہیں کہ منیش کشیپ نے خاتون جونیئر ڈاکٹر کے ساتھ غیر مہذب سلوک کیا تو دوسری طرف منیش کشیپ کے حامی ان پر یرغمال بنانے کے بعد مار پیٹ کا الزام لگا رہے ہیں۔

اس پورے معاملے کے حوالے سے پیربہور تھانے کے انچارج عبدالحلیم نے واقعے کی تصدیق کرتے ہوئے کہا کہ اس معاملے کی اطلاع ملتے ہی تھانے کی پولیس اسپتال پہنچی، جس کے بعد ثالثی کی گئی اور دونوں فریقین نے کہا کہ وہ آپس میں معاملہ حل کر چکے ہیں۔(بشکریہ نیوز پورٹل ’آج تک‘)