یوگی حکومت کا نیا فرمان، یونیورسٹیوں و کالجوں میں موبائل پر پابندی عائد

اتر پردیش میں یوگی حکومت نے یونیورسٹیوں اور ڈگری کالجز میں موبائل فون پر پابندی عائد کر دی ہے۔ اس کی جانکاری ہایر ایجوکیشن ڈائریکٹوریٹ کی طرف سے دی گئی ہے۔ یہ نیا قانون صرف طلبا پر نہیں بلکہ پڑھانے والے ٹیچرس پر بھی نافذ ہوگا۔ اس نئے قانون سے کیمپس میں داخل ہوتے ہی طلبا اور اساتذہ یا پروفیسر فون کا استعمال نہیں کر پائیں گے۔

ہندوستان ٹائمز میں شائع خبر کے مطابق اتر پردیش کی سبھی یونیورسٹیوں اور کالجوں میں پڑھائی-لکھائی کا بہتر ماحول بنانے کے لیے ایسا کیا جا رہا ہے۔ ہایر ایجوکیشن ڈائریکٹوریٹ نے کہا ہے کہ حکومت کافی وقت سے یہ دیکھ رہی تھی کہ کالجوں و یونیورسٹیوں میں لوگ زیادہ سے زیادہ وقت موبائل فون استعمال کرنے میں لگا رہے تھے۔

شائع خبر میں یہ بھی بتایا گیا ہے کہ اگر طلبا یا اساتذہ ان نئے قوانین کی خلاف ورزی کرتے ہوئے نظر آتے ہیں تو ان کا موبائل فون ضبط کر لیا جائے گا۔ علاوہ ازیں طلبا کے گھر والوں کو بلا کر اس کی شکایت بھی کی جائے گی۔

واضح رہے کہ اس سے پہلے یوگی حکومت نے ریاست کی کابینہ کی میٹنگ میں بھی افسروں اور لیڈروں کے فون استعمال کرنے پر پابندی لگا دی تھی۔ اس بارے میں کہا گیا تھا کہ افسر اور لیڈران میٹنگ کے دوران میسجز پر دھیان زیادہ دیتے تھے۔ لیکن اس قانون کو لے کر کئی لوگوں نے یہ بھی کہا تھا کہ میٹنگ کی خبریں میڈیا میں نہ جائیں، اس وجہ سے موبائل استعمال کرنے پر پابندی لگائی گئی تھی۔