ڈاکٹر فرحین کی ایک عرضی سے دفتر میں کام کرنے والی متعدد ماؤں کا مسئلہ حل

ڈاکٹر فرحین بیگم دہلی میں پانچ او پی ڈی کا نظام دیکھتی ہیں۔ ان کی زندگی بھاگ دوڑ سے بھری ہوئی ہے۔ صبح دفتر، پھر فیلڈ، اور پھر کام نمٹا کر دوبارہ شام کو دفتر اس لیے جاتی ہیں تاکہ اپنی حاضری لگا سکیں۔ زیادہ وقت نہیں ہوا ہے جب وہ نئی نئی ماں بنی تھیں، اور اس وقت انھیں بے پناہ پریشانیاں جھیلنی پڑی تھیں۔ انہی پریشانیوں سے تنگ آ کر انھوں نے سی اے ٹی یعنی سنٹرل ایڈمنسٹریٹو ٹریبونل میں عرضی دائر کی تھی اور سوال کیا تھا کہ آخر دفتر میں کام کرنے والی ماؤں کو بلاوجہ کی پریشانیاں کیوں جھیلنی پڑتی ہیں اور وہ حق انھیں کیوں نہیں ملتا جو کہ ملنا چاہیے۔

ڈاکٹر فرحین کی داخل اس عرضی کا فائدہ اب دفتر میں کام کرنے والی ہر نئی ماں کو ملنے والا ہے کیونکہ سی اے ٹی نے فرحین کے حق میں فیصلہ سنا دیا ہے۔ سی اے ٹی نے عرضی پر غور کرتے ہوئے کہا کہ چھوٹے بچوں کی مائیں اب فیلڈ سے سیدھے گھر جا سکتی ہیں اور انھیں دفتر پہنچ کر حاضری لگانے کی کوئی ضرورت نہیں۔

سی اے ٹی نے ڈاکٹر فرحین کی عرضی پر سماعت کے دوران ماؤں کو فائدہ پہنچانے والے ایکٹ 2017 کی ضمنی دفعہ 3 بی (5) کو متعارف کیا اور کہا کہ اگر خاتون کو دفتر آنے کے لیے مجبور کیا جاتا ہے تو اس قانون کا اصل مقصد ہی فوت ہو جائے گا۔ سی اے ٹی رکن بشنوئی نے فیصلہ سنائے جانے کے دوران کہا کہ دفتر کے باہر کام ختم ہونے کے بعد خواتین پر بایو میٹرک سسٹم سے حاضری لگانے کا دباؤ نہیں بنایا جا سکتا۔

جہاں تک ڈاکٹر فرحین کے ذریعہ سی اے ٹی میں عرضی داخل کیے جانے کا سوال ہے، انھوں نے کافی پریشانی کا سامنا کرنے کے بعد یہ قدم اٹھانے کا فیصلہ کیا تھا۔ ڈاکٹر فرحین کا بچہ جب ایک سال کا تھا تو وہ فیلڈ کا کام نمٹا کر دوبارہ شام کو دفتر صرف اس لیے جاتی تھیں تاکہ حاضری لگا سکیں۔ اس بھاگ دوڑ کی وجہ سے وہ اپنے بچے کو وقت نہیں دے پا رہی تھیں۔ جب انھوں نے دفتر میں فیلڈ سے سیدھے گھر جانے کی اجازت چاہی تو انھیں کسی طرح کا رد عمل نہیں ملا۔ ڈاکٹر فرحین کو سب سے زیادہ تکلیف اس وقت ہوئی جب اگلے ہی مہینے ان کی تنخواہ روک دی گئی۔ لیکن اب وہ خوش ہیں کیونکہ نہ صرف سی اے ٹی نے ان کے اور دفتر میں کام کرنے والی ماؤں کے حق میں فیصلہ سنایا ہے بلکہ یہ حکم بھی صادر کیا ہے کہ ڈاکٹر فرحین کی روکی گئی تنخواہ جلد ادا کی جائے۔