دہلی میں ناجائز تعلقات کے شک میں خاتون کا بے رحمی سے قتل، شاطر شوہر گرفتار

 قومی راجدھانی کے جہانگیر پوری علاقے میں ایک شوہر نے غیر ازدواجی تعلقات کے شبہ میں اپنی بیوی کو بے دردی سے قتل کردیا۔ اس کے بعد اس کی لاش کھلے نالے میں پھینک دی۔ ملزم کی شناخت 31 سالہ وشنو شرما کے طور پر ہوئی ہے، جس پر اپنی بیوی کے قتل کا الزام لگایا گیا ہے۔ پولیس نے ملزم کے خلاف تعزیرات ہند کی متعلقہ دفعات کے تحت مقدمہ درج کرکے اسے گرفتار کرلیا ہے۔

اطلاعات کے مطابق 14 نومبر کی شام تقریباً 4.30 بجے یشپال نامی شخص نے پولس کو پی سی آر کال کرکے اطلاع دی کہ نالے کے پاس ایک خاتون کی لاش پڑی ہوہے۔ پولیس کی ٹیمیں جب جائے وقوعہ پر پہنچیں تو انہیں خاتون کی جزوی طور پر ڈوبی ہوئی لاش ملی۔ ابتدائی تفتیش کے دوران ہی وشنو شرما جائے وقوعہ پر پہنچ گیا۔ اس نے متوفی کی شناخت اپنی بیوی کے طور پر کی۔

پولیس کو اس کے رویے کی وجہ سے اس پر شک ہوا تو اسے پوچھ گچھ کے لیے حراست میں لے لیا۔ پہلے تو اس نے پولیس کو گمراہ کرنے کی کوشش کی لیکن جب اس سے سختی سے پوچھ گچھ کی گئی تو اس نے اپنے جرم کا اعتراف کر لیا۔ وشنوشرما نے پولیس کو بتایا کہ اسے طویل عرصے سے اپنی بیوی پر کسی دوسرے شخص کے ساتھ ناجائز تعلقات ہونے کا شک تھا۔ اس شک نے دونوں کے درمیان گزشتہ کئی مہینوں سے تناؤ اور تنازعہ پیدا کر رکھا تھا۔

اس دوران 13 نومبر کو رات 9 بجے کے قریب دونوں میں پھر لڑائی ہوئی۔ اس بار جھگڑا اس حد تک بڑھ گیا کہ وشنو اپنا آپا کھو بیٹھا اور غصے میں اس نے گھرکے اندرہی اپنی بیوی کا قتل کر دیا۔ واردات کے بعد اس نے خود کو بچانے کے لیے ایک انتہائی منصوبہ بند قدم اٹھایا۔ اس نے لاش کو اپنے کندھوں پر اٹھا کر انڈسٹرل علاقہ کے پاس ایک کھلے نالے میں پھینک کر چلا گیا تاکہ ثبوت پوری طرح مٹ جائیں۔

پولیس نے تفتیش شروع کی تو آس پاس کے علاقے کی سی سی ٹی وی فوٹیج کی جانچ کی گئی۔ اس میں ملزم کو رات کے وقت بیوی کی لاش کے ساتھ نالے کی طرف جاتے ہوئے واضح طور پر دیکھا گیا۔ یہی ثبوت اس کے خلاف فیصلہ کن ثابت ہوا۔ پولیس کی تفتیش میں یہ بھی معلوم ہوا کہ ملزم عادتاً مجرم تھا۔ اس کے خلاف پہلے سے ایکسائز کی خلاف ورزی اور چوری کے 3 مقدمات درج تھے۔ اس کے خلاف جانچ بھیکی گئی تھی۔

پولیس اب اس بات کی بھی جانچ کررہی کہ قتل سے پہلے دونوں کے درمیان کس طرح کے حالات پیدا ہوئے تھے، کیا کسی اور شخص کا اس رشتے میں دخل تھا؟ فی الحال وشنو کو گرفتار کر کے مزید قانونی کارروائی شروع کر دی گئی ہے۔ جہانگیرپوری کا واقعہ اس خطرناک سچائی کو اجاگر کرتا ہے کہ شک اور بد اعتمادی جب جرم کی شکل اختیار کر لیتی ہے تو اس کا نتیجہ اکثر موت کی صورت میں نکلتا ہے۔ (بشکریہ نیوز پورٹل ’آج تک‘)