یوگی حکومت میں بلند شہر تشدد کے ملزمین کو پَہنائی گئی پھولوں کی مالا، کانگریس نے کی تنقید

یوگی راج میں موب لنچنگ کے ملزمین کا پھول مالا پہنا کر استقبال کرنے کا معاملہ سامنے آیا ہے۔ ان سبھی ملزمین کا تعلق بلند شہر تشدد سے ہے۔ اس استقبال کو لے کر کانگریس نے بی جے پی حکومت کو تنقید کا نشانہ بنایا ہے۔ کانگریس نے ٹوئٹ کرتے ہوئے لکھا ہے کہ ’’بلند شہر تشدد کے ملزمین کا پھول مالا پہنا کر استقبال کرنا اور اس میں بی جے پی حکومت کے نظریات کے لوگوں کا شامل ہونا، اس حکومت کی زوال پذیر اخلاقیات کی علامت ہے۔‘‘ ٹوئٹ میں مزید لکھا گیا ہے کہ ’’جے شری رام کے نعرے لگا کر ایسا (غلط) عمل کرنا بھگوان رام کی بھی بے عزتی ہے۔‘‘

دراصل گزشتہ سال دسمبر میں بلند شہر کے سیانا علاقہ میں گئوکشی کی افواہ کے بعد ہوئے تشدد میں شامل ملزمین کا ہفتہ کے روز ضمانت پر جیل سے باہر آنے کے بعد ہیرو کی طرح استقبال کیا گیا۔ ہائی کورٹ کے حکم پر ان سبھی کو ضمانت پر آزاد کیا گیا ہے۔ آزاد ہونے والوں میں شکھر اگروال، ہیمو، اوپیندر یادو، روہت راگھو، جیتو فوجی، راج کمار اور سورو کے نام شامل ہیں۔

دوسری طرف ملزمین کے باہر آنے پر سبودھ سنگھ کی بیوی نے غم کا اظہار کیا ہے۔ انھوں نے کہا کہ اس فیصلے نے مجھے کافی تکلیف پہنچائی ہے۔ وہ کہتی ہیں کہ ’’میں پوچھنا چاہتی ہوں کہ یہ فیصلہ کس بنیاد پر سنایا گیا ہے۔ میں وزیر اعلیٰ سے مطالبہ کرتی ہوں کہ ان کی ضمانت رَد کی جائے۔‘‘

واضح رہے کہ 3 دسمبر 2018 کو بلند شہر کے سیانا واقع چنگراوٹی گاؤں میں گئوکشی کی افواہ کے بعد تشدد پھیل گیا تھا۔ اس تشدد میں انسپکٹر سبودھ کمار کا گولی مار کر قتل کر دیا گیا تھا۔ تشدد کے دوران کئی جگہوں پر آتشزنی کا واقعہ بھی پیش آیاتھا۔ اس واقعہ کے تعلق سے پولس نے معاملہ درج کر 38 لوگوں کو جیل بھیجا تھا۔ 38 میں سے 6 ملزمین ساڑھے سات مہینے کے بعد جیل سے ضمانت پر آزاد ہو کر ہفتہ کے روز باہر نکلے ہیں۔