اتر پردیش میں پھر بدلا موسم کا مزاج، کئی ضلعوں میں بارش کا الرٹ جاری

 اتر پردیش میں گزشتہ 24 گھنٹوں میں مانسون معمول پر رہا۔ اس دوران ریاست کے مغربی اور مشرقی دونوں حصوں میں ہلکی سے درمیانی بارش دیکھنے کو ملی۔ آنے والے دنوں میں شدید بارش کا امکان ظاہر کیا جا رہا ہے۔ محکمہ موسمیات کے مطابق اگلے 3 دنوں میں اتر پردیش میں مانسون کی فعالیت میں اضافہ کا امکان ہے، جس کی وجہ سے 2 ستمبر تک شدید بارش کا الرٹ بھی جاری کیا گیا ہے۔

آئی ایم ڈی لکھنؤ کی طرف سے جاری پیشن گوئی کے مطابق 5 ستمبر تک مغربی یوپی اور مشرقی پوپی کے کچھ مقامات میں گرج اور چمک کے ساتھ بارش ہو سکتی ہے۔ حالانکہ محکمہ موسمیات نے مغربی یوپی ڈویژن میں کہیں کہیں شدید سے انتہائی شدید بارش کا امکان ظاہر کیا ہے۔ اس کے علاوہ مشرقی یوپی کے لیے آج کوئی وارننگ جاری نہیں کی گئی ہے۔

محکمہ موسمیات کے مطابق اگلے تین دنوں کے دوران زیادہ سے زیادہ درجہ حرارت میں رفتہ رفتہ 5-3 ڈگری سیلسیس کی گراوٹ اور اس کے بعد 4-2 ڈگری سیلسیس اضافہ ہونے کا امکان ہے۔ وہیں اگلے 5 دنوں کے دوران کم سے کم درجہ حرارت میں کوئی بڑی تبدیلی ہونے کے آثار نہیں ہیں۔

آئی ایم ڈی نے گوتم بدھ نگر، متھرا، بلند شہر، علی گڑھ، امروہا، مراد آباد، سنبھل، رام پور، بریلی، پیلی بھیت، لکھیم پور کھیری، شاہجہاں پور، بدایوں، ایٹا، فیروز آباد، آگرہ، ہاتھرس، کاسگنج، امیٹھی، ایودھیا اور سلطان پور میں بارش کا آرینج الرٹ جاری کیا ہے۔

یوپی کے اہم شہروں کے درجہ حرارت کی بات کی جائے تو پریاگ راج میں 30.4 ڈگری سیسلیس، بہرائچ میں 27.4 ڈگری سیلسیس، بریلی میں 26 ڈگری سیلسیس، فرصت گنج میں 30.8 ڈگری سیلسیس، گورکھپور میں 27.8 ڈگری سیلسیس، جھانسی میں 27.2 ڈگری سیلسیس، لکھنؤ ایئر پورٹ میں 34 ڈگری سیلسیس اور میرٹھ میں 32 ڈگری سیلسیس درجہ حرارت رہے گا۔