قومی خبریں

زبردست ہنگامے اور ووٹنگ کے بعد وجے کمار بہار اسمبلی کے اسپیکر منتخب

بہار میں بدھ کے روز اسمبلی اسپیکر عہدہ کے لیے انتخاب عمل میں آیا۔ این ڈی اے امیدوار وجے کمار سنہا نے اس میں جیت حاصل کی اور نئے اسمبلی اسپیکر کی ذمہ داری سنبھالی۔

وجے سنہا، تصویر یو این آئی
وجے سنہا، تصویر یو این آئی 

بہار میں برسراقتدار این ڈی اے میں شامل بی جے پی رکن اسمبلی وجے کمار سنہا کو بہار اسمبلی کا اسپیکر منتخب کر لیا گیا ہے۔ این ڈی اے امیدوار وجے کمار کے حق میں 126 ووٹ پڑے جب کہ ان کے خلاف 114 ووٹ ڈالے گئے۔ اس دوران مہاگٹھ بندھن کے اراکین اسمبلی کی جانب سے انتخابی عمل پر سوال کھڑے کرتے ہوئے ہنگامہ بھی کیا گیا۔ دراصل اپوزیشن کی جانب سے خفیہ ووٹنگ کی اپیل کی گئی تھی جس کو مسترد کر دیا گیا۔

Published: undefined

اسمبلی اسپیکر کے لیے ووٹنگ کے بعد جب نتیجہ سامنے آیا تو مہاگٹھ بندھن امیدوار اور سیوان سے رکن اسمبلی اودھ بہاری چودھری کو 114 ووٹ ہی حاصل ہو سکے۔ بعد ازاں وزیر اعلیٰ نتیش کمار اور اپوزیشن لیڈر تیجسوی یادو نے این ڈی اے امیدوار وجے کمار سنہا کو اسپیکر کی کرسی تک پہنچایا اور انھیں مبارکباد دی۔ قابل ذکر ہے کہ بہار میں ایسا پانچ دہائی بعد ہوا ہے جب اسپیکر عہدہ کے لیے ووٹنگ کی ضرورت پڑی ہو۔

Published: undefined

آج بہار اسمبلی کے پروٹیم اسپیکر جیتن رام مانجھی نے کارروائی شروع ہونے کے بعد اسپیکر عہدہ کو لے کر صوتی ووٹوں سے انتخاب کرانے کی بات کہی، تب اپوزیشن کے اراکین نے وزیر اعلیٰ نتیش کمار کی موجودگی کو لے کر ہنگامہ شروع کر دیا۔ اس دوران وہ ویل میں بھی آ گئے۔ ہنگامہ کو دیکھتے ہوئے پروٹیم اسپیکر بار بار اراکین کو اپنی سیٹ پر جانے کے لیے گزارش کرتے رہے۔

Published: undefined

اپوزیشن کا کہنا تھا کہ وزیر اعلیٰ اس ایوان کے رکن نہیں ہیں۔ اس وجہ سے ووٹنگ کے دوران ایوان میں موجود نہیں رہ سکتے۔ حالانکہ پروٹیم اسپیکر نے اسے ضابطہ کے مطابق قرار دیا اور کہا کہ یہ وزیر اعلیٰ ہیں، ایوان میں موجود رہ سکتے ہیں لیکن ووٹنگ میں شامل نہیں ہوں گے۔ اس کے بعد بھی جب اپوزیشن کا ہنگامہ ختم نہیں ہوا تو پروٹیم اسپیکر نے پانچ منٹ کے لیے کارروائی ملتوی کر دی۔ بعد ازاں ایوان کی کارروائی شروع ہوئی اور ووٹنگ کا عمل انجام پایا۔

Published: undefined

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔

Published: undefined