آوارہ کتوں کے معاملے پر وجے گوئل نے سپریم کورٹ کے فیصلے پر اٹھائے سوال

دارالحکومت دہلی کے جواہر لال نہرو اسٹیڈیم کمپلیکس کے اندر آوارہ کتوں نے دو غیر ملکی کوچوں پر حملہ کر دیا۔ چار سکیورٹی اہلکار بھی آوارہ کتوں  کے کاٹنے سے زخمی ہو گئے اور وہ اسپتال میں داخل ہوئے۔ جس کے بعد میونسپل کارپوریشن متحرک ہو ئی ہے اور مختلف مقامات سے آوارہ کتوں کو پکڑ رہی ہے ۔

بی جے پی کے لیڈ راور سابق وزیر وجے گوئل نے کہا کہ "یہ ملک کی ساکھ پر ایک داغ ہے، کیا سپریم کورٹ کے جج جنہوں نے کتوں کو سڑکوں پر چھوڑنے کا حکم دیا تھا، اب اس کی ذمہ داری لیں گے؟ ملک کی بدنامی ہو رہی ہے، ذمہ دار کون ہے؟"کیا کتوں کو سڑکوں پر چھوڑنے کا حکم دینے والے سپریم کورٹ کے جج اب اس کی ذمہ داری لیں گے؟

پہلے واقعے میں کینیا کے کوچ ڈینس پر مقابلے کے میدان کے قریب ایک کتے نے حملہ کیا جس سے ان کی ٹانگ پر گہرا زخم آیا جس سے خون بہنے لگا۔ تھوڑی دیر بعد جاپانی کوچ میکو اوکوماٹسو کو بھی وارم اپ ٹریک کے قریب ٹریننگ سیشن کے دوران کتے نے کاٹ لیا۔دونوں کوچز کو فوری طور پر اسٹیڈیم کے میڈیکل روم میں ابتدائی طبی امداد دی گئی اور پھر صفدر جنگ اسپتال لے جایا گیا۔ اسپتال ذرائع کے مطابق دونوں کی حالت اب مستحکم ہے۔

اس واقعہ کے بعد وزارت کھیل، دہلی حکومت اور میونسپل کارپوریشن حرکت میں آگئے ہیں۔ این ڈی ایم سی اور ایم سی ڈی کی ٹیموں نے اسٹیڈیم کمپلیکس اور آس پاس کے علاقوں میں آوارہ کتوں کو پکڑنے کی مہم شروع کی ہے۔ ان واقعات کے بعد انتظامیہ نے آوارہ کتوں کو بحفاظت نکالنے کے لیے کتے پکڑنے والی چار مستقل ٹیمیں، ریپڈ ریسپانس یونٹ اور گاڑیاں اسٹیڈیم کمپلیکس کے اندر تعینات کر دی ہیں۔

11 اگست کو سپریم کورٹ نے ہدایت دی کہ دہلی-این سی آر میں تمام آوارہ کتوں کو عارضی طور پر پناہ گاہوں میں رکھا جائے۔ تاہم، 22 اگست کو ایک نظرثانی شدہ حکم نامے میں کہا گیا تھا کہ کتوں کو نس بندی اور ویکسینیشن کے بعد ان کے اصل علاقے میں واپس چھوڑ دیا جائے گا۔