انکتا بھنڈاری قتل واقعہ کی سی بی آئی جانچ نہیں ہوگی، نینی تال ہائی کورٹ نے سنایا فیصلہ

نینی تال ہائی کورٹ نے انکتا بھنڈاری قتل واقعہ سے متعلق ایک اہم فیصلہ سناتے ہوئے کہا ہے کہ اس کی سی بی آئی جانچ نہیں کرائی جائے گی۔ ہائی کورٹ نے سی بی آئی جانچ کرانے سے متعلق داخل عرضی کو خارج کر دیا ہے۔ ہائی کورٹ نے ایس آئی ٹی جانچ پر اپنا اعتماد ظاہر کیا ہے اور کہا ہے کہ اس معاملے میں سی بی آئی جانچ کی ضرورت نہیں ہے۔

قابل ذکر ہے کہ انکتا بھنڈاری قتل واقعہ کی جانچ سی بی آئی سے کرانے کا مطالبہ کیا گیا تھا۔ یہ عرضی صحافی آشوتوش نیگی نے داخل کی تھی، لیکن عدالت نے عرضی کو خارج کرنے کا فیصلہ سنایا۔ انکتا بھنڈاری کے اہل خانہ نے بھی سی بی آئی جانچ کا مطالبہ کیا تھا، لیکن نینی تال ہائی کورٹ نے اس کے لیے رضامندی نہیں دی۔

اس سے قبل 26 نومبر کو سی بی آئی جانچ کا مطالبہ کرنے والی عرضی پر فیصلہ محفوظ رکھ لیا گیا تھا۔ بدھ کے روز ہائی کورٹ نے جب اپنا فیصلہ سنایا تو واضح لفظوں میں کہا کہ ’’اس معاملے میں سی بی آئی جانچ کی ضرورت نہیں ہے۔‘‘ واضح رہے کہ انکتا بھنڈاری کا قتل 18 ستمبر کی شب کو کیا گیا تھا۔ قتل کا الزام اس ریسورٹ کے مالک پر ہے جہاں وہ رسپشنسٹ کے طور پر کام کر رہی تھی۔