اردو یونیورسٹی کشمیر کیمپس: پوسٹ گریجویشن کے چار کورسز میں داخلے جاری

سری نگر: ملک کی واحد اردو یونیورسٹی 'مولانا آزاد نیشنل اردو یونیورسٹی' کے کشمیر سیٹلائٹ کیمپس میں نئے تعلیمی سال کے لئے پوسٹ گریجویشن کے چار ریگولر کورسز میں آن لائن داخلے جاری ہیں۔ معاشیات، اسلامک اسٹیڈیز، اردو اور انگریزی کے پوسٹ گریجویشن کورسز میں میرٹ کی بنیادوں پر داخلہ دیا جائے گا اور داخلہ فارم آن لائن جمع کرنے کی آخری تاریخ 30 ستمبر مقرر ہے۔

اردو یونیورسٹی جو کہ ایک سینٹرل یونیورسٹی ہے، کے زیر انتظام و انصرام کشمیر سیٹلائٹ کیمپس ہمہامہ – بڈگام روڈ پر واقع ہے جہاں سے سری نگر ہوائی اڈہ چند منٹوں کے فاصلے پر واقع ہے اور بڈگام ریلوے سٹیشن بھی بالکل متصل ہی ہے۔ کشمیر سیٹلائٹ کیمپس میں دونوں لڑکوں اور لڑکیوں کے داخلے کھلے ہیں۔ داخلہ فیس باقی یونیورسٹیوں کے مقابلے میں نہ ہونے کے برابر ہے جبکہ لڑکیوں کی فیس لڑکوں کے داخلہ فیس سے نصف حصہ کم ہے۔

کشمیر کیمپس میں تعینات شعبہ اسلامک اسٹڈیز کے ایسوسی ایٹ پروفیسر ڈاکٹر غضنفر علی خان نے یو این آئی اردو کے ساتھ بات کرتے ہوئے کہا کہ 'یہ کالج مناسب ترین جگہ پر واقع ہے اور مرکزی یونیورسٹی ہونے کے ناطے یہاں فیس انتہائی کم ہے اور فیکلٹی اعلیٰ تعلیم یافتہ اور محنتی ہے لہٰذا وہ بچے خوش قسمت ہوں گے جو یہاں داخلہ لینے میں کامیاب ہوجائیں گے'۔

پروفیسر ڈاکٹر غضنفر علی خان نے کہا کہ اس کالج میں تعلیم و تربیت کا بہت ہی خوشگوار ماحول ہے اور بچوں کی بہتر تعلیم و تربیت کا خاص خیال رکھا جارہا ہے۔ موصف نے کہا کہ یہ کالج خاص طور پر بچیوں کے لئے مناسب ترین ہے کیونکہ یہاں نہ صرف فیس نہ ہونے کے برابر ہے بلکہ ڈگری بھی مقررہ وقت میں ہی مکمل کرانے کی کوشش کی جاتی ہے۔

انہوں نے کہا کہ موجودہ حالات میں ہم آن لائن کلاسز لیتے ہیں اور فور جی انٹرنیٹ خدمات کی عدم دستیابی کی وجہ سے زیادہ تر مواد طلبا کو واٹس ایپ پر فراہم کرتے ہیں۔ ڈاکٹر غضنفر علی نے کہا کہ ہم طلبا کے ساتھ فون پر بھی مسلسل رابطے میں ہیں اور انہیں پڑھائی میں آنے والی دشواریوں کا فون پر بھی ازالہ کرتے ہیں۔

کالج کے شعبہ اسلامک اسٹڈیز میں زیر تعلیم نرجس خاتون نامی ایک طالبہ کا کہنا ہے کہ 'اس کالج میں صرف فیس ہی نہ ہونے کے برابر ہی نہیں ہے بلکہ یہاں پڑھانے کا ماحول بھی باقی یونیورسٹیوں سے بالکل مختلف ہے۔ یہاں اساتذہ ایک جذبے اور دیانتداری کے ساتھ طلبا کو پڑھاتے ہیں'۔ موصوف طالبہ کا کہنا ہے کہ یہ کالج طلبا کے لئے تعلیمی سفر جاری رکھنے کا بہترین اور مناسب ترین ادارہ ہے۔ انہوں نے کہا کہ یہاں ہر کورس اپنے مقررہ وقت پر مکمل ہوتا ہے اور امتحانات بھی مقررہ شیڈول کے مطابق منعقد کئے جاتے ہیں۔ نرجس خاتون نے کہا کہ کالج ایک ایسی جگہ پر واقع ہے جو بڈگام ریلوے سٹیشن اور سری نگر ہوائی اڈے کے بالکل قریب ہے اور سری نگر جانے کے لئے درجنوں کی تعداد میں گاڑیاں ہر وقت دستیاب رہتی ہیں۔

دریں اثنا یونیورسٹی ہیڈکوارٹر حیدرآباد سے جاری داخلہ اعلامیہ کے مطابق تمام درخواست گزاروں کے لئے لازمی ہے کہ وہ کم از کم دسویں /بارہویں میں اردو میڈیم سے تعلیم حاصل کرچکے ہوں یا بحیثیت زبان یا مضمون، اردو کامیاب ہوں یا مصرحہ مدرسوں سے فارغ ہوں جن کا ذریعہ تعلیم اردو ہو۔ تمام پروگراموں کا ذریعہ تعلیم اردو ہے۔

تمام پروگراموں میں داخلے مولانا آزاد نیشنل اردو یونیورسٹی حیدرآباد کیمپس میں بھی دستیاب ہیں. درخواستیں یونیورسٹی ویب سائٹ manuu.edu.in پر صرف آن لائن ہی قبول کی جائیں گی۔ تفصیلات یا کسی وضاحت کے لئے نظامت داخلہ کو admissionsregular@manuu.edu.in پر ای میل کریں۔ ایس سی / ایس ٹی / اوبی سی / معذور امیدواروں کے مختلف پروگراموں میں داخلے کے لئے تحفظات حکومت ہند کے ضوابط کے مطابق رہیں گے۔ یونیورسٹی میں ہاسٹل کی محدود گنجائش فراہم ہے۔