اتر پردیش: مفت راشن میں مٹی اور نمک کی ملاوٹ، ڈی ایم نے مقدمہ درج کرنے کا حکم دیا

اتر پردیش کے ضلع امیٹھی میں غریبوں کے لیے مفت راشن اسکیم کے تحت تقسیم کیے جانے والے غذائی اجناس کی بوریاں مٹی اور نمک سے آلودہ پائی گئیں۔ یہ معاملہ اس وقت سامنے آیا جب ضلع مجسٹریٹ (ڈی ایم) سنجے چوہان نے شکایات کے بعد اچانک دورہ کر کے ذخیرہ شدہ راشن کی جانچ کی۔ اس کے بعد انہوں نے فوری طور پر متعلقہ افسران کو ہدایت دی کہ خراب اناج کو صاف اناج سے تبدیل کیا جائے اور ذمہ داروں کے خلاف سخت کارروائی کی جائے۔

جمعہ کو جاری کیے گئے ایک سرکاری بیان کے مطابق، غبن اور بدعنوانی کی مسلسل شکایات کے پیش نظر ڈی ایم سنجے چوہان نے جمعرات کے روز جگدیش پور بلاک کے جلالپور تیواری گاؤں میں اناج کی سرکاری دکان ’اَنّ پورنا بھون‘ کا معائنہ کیا۔ اس دوران راشن کی بوریاں چیک کی گئیں، جن میں سے متعدد میں واضح طور پر مٹی اور نمک کی ملاوٹ پائی گئی۔

ڈی ایم نے فوری کارروائی کرتے ہوئے ضلع سپلائی افسر اور ضلع فوڈ اینڈ مارکیٹنگ افسر کو ہدایت دی کہ جس راشن میں ملاوٹ پائی گئی ہے، اسے فوری طور پر تبدیل کیا جائے اور صاف ستھرا اناج فراہم کیا جائے تاکہ مستحقین کو نقصان نہ ہو۔ اس کے ساتھ ہی، انہوں نے ایڈیشنل ڈسٹرکٹ مجسٹریٹ (فائنانس و ریونیو) کی سربراہی میں ایک تفتیشی ٹیم بنانے کا اعلان کیا تاکہ معاملے کی گہرائی سے جانچ کی جا سکے۔

ڈی ایم سنجے چوہان نے یہ بھی کہا کہ جہاں کہیں بھی ایسی شکایات موصول ہوں، وہاں افسران فوری پہنچ کر موقع پر موجود راشن کی بوریاں چیک کریں اور اگر ملاوٹ ثابت ہو تو انہیں فوراً تبدیل کر کے صاف اناج فراہم کیا جائے۔ انہوں نے یہ بھی واضح کیا کہ راشن میں ملاوٹ کرنے والوں کے خلاف متعلقہ دفعات کے تحت ایف آئی آر درج کی جائے گی اور ان کے خلاف سخت قانونی کارروائی کی جائے گی۔

ضلع اطلاعاتی افسر شیو درشن یادو نے بتایا کہ اس سے قبل درپی پور گاؤں میں بھی سرکاری راشن میں ملاوٹ کی شکایت موصول ہوئی تھی۔ اس واقعے کے بعد ڈی ایم نے خود موقع پر جا کر معائنہ کیا اور سخت احکامات دیے۔ عوامی فلاح و بہبود کے لیے چلائی جانے والی اس اہم اسکیم میں اس طرح کی بدعنوانی سامنے آنا انتہائی افسوسناک ہے اور حکام نے اس پر سخت رویہ اپناتے ہوئے اصلاحی قدم اٹھانا شروع کر دیے ہیں۔

ضلعی انتظامیہ نے عوام سے اپیل کی ہے کہ اگر کہیں بھی راشن میں ملاوٹ یا غیر معیاری اناج فراہم کرنے کی شکایت ہو تو فوراً متعلقہ دفتر یا ٹول فری نمبر پر اطلاع دیں تاکہ بروقت کارروائی ممکن ہو سکے۔