اتر پردیش میں آج رات سے 13جولائی تک مکمل لاک ڈاؤن

اتر پردیش حکومت نے فیصلہ لیا ہے کہ وہ کورونا وائرس کے معاملوں میں اضافہ کی وجہ سے ریاست میں آج رات دس بجے سے 13جولائی کی صبح پانچ بجے تک یعنی 55 گھنٹے کے لئے پھر سے لاک ڈاؤن نافذ کر رہی ہے۔

حکومت کے احکام کے مطابق ضروری اشیا کی دستیابی کو یقینی بنایا جائے گا اور یہ بھی یقینی بنایاجائے گا کہ عوام کو کسی طرح کی پریشانی کا سامنا نہ کرنا پڑے۔

حکومت کے احکام کے مطابق ریاست کے تمام دفاتر ، شہری اوردیہاتی ہاٹ، بازار، منڈی اور تجارتی مراکز بندرہیں گے۔اسپتال اور طبی مراکز پہلے کی طرح کھلے رہیں گے۔طبی خدمات سے جڑے لوگوں کو ایک جگہ سے دوسری جگہ جانے میں کوئی روک ٹوک نہیں ہوگی۔ ریل خدمات جاری رہیں گی اور بسوں کا انتظام حکومت کی جانب سے کیا جائے گا۔مال لے جانے والی گاڑیوں پرکوئی پابندی نہیں لگے گی۔دیہات کے علاقوں کے کارخانہ کھلے رہیں گے اور شہرمیں صرف وہ صنعتی مرکز کھلے رہیں گے جو مستقل چل رہے ہیں۔

واضح رہے نئی رہنماہدایات کےمطابق ایکس پریس وے اوربڑے پلوں کے تعمیراتی کام جاری رہیں گے۔لاک ڈاؤن پرعمل کرانے کے لئے ضلع میجسٹریٹ اور پولیس افسران علاقوں کا مل کر دورہ کریں گے اور نفاذ کویقینی بنائیں گے۔