یوپی انتخابات: اپرنا یادو نے اٹاوہ میں نہیں ڈالا ووٹ

اتر پردیش اسمبلی انتخابات کے تیسرے مرحلے میں جب پورا یادو خاندان ایک ساتھ ووٹ ڈالنے کے لیے نکلا تو کچھ اہم اراکین غیر حاضر تھے۔ اتوار کو ملائم سنگھ یادو کے چھوٹے بیٹے پرتیک یادو اور ان کی اہلیہ اپرنا یادو ووٹ ڈالنے کے لیے نہیں آئے، حالانکہ ان کے حامی شام تک ان کا انتظار کرتے رہے۔ ملائم کی دوسری بیوی سادھنا گپتا نے بھی ووٹ نہیں ڈالا۔ یہ پہلا موقع ہے جب سادھنا گپتا، پرتیک اور اپرنا یادو نے ووٹنگ سے فاصلہ بنائے رکھا۔

ذرائع کے مطابق اپرنا یادو کے گزشتہ ماہ بی جے پی میں شامل ہونے کے بعد سے ان کے یادو خاندان سے تعلقات میں تلخی پیدا ہو گئی ہے۔ اپرنا یادو بی جے پی کے لیے انتخابی مہم چلا رہی ہیں اور ایس پی کے خلاف کھل کر بول رہی ہیں۔ ایس پی کے سینئر لیڈر پروفیسر رام گوپال یادو اور شیو پال یادو پہلے ہی اپرنا یادو کے اس فیصلے پر ناراضگی ظاہر کر چکے ہیں۔