للو کی درخواست ضمانت نامنظور، اگلی سماعت 16 جون کو

اترپردیش کانگریس کے صدر اجے کمار للو کی ضمانت عرضی پر سماعت 16جون تک کے لئے ملتوی کردی گئی ہے۔

اجے کمار للو کے خلاف آگرہ میں لاک ڈاؤن کے اصولوں کی خلاف ورزی اور مزدوروں کے لئے فراہم کی گئی بسوں کی فہرست میں دھوکہ دھڑی کا الزام ہے۔ ہائی کورٹ کی لکھنؤ بنچ کے جج اے آر مسودی کی عدالت میں کل للو کی ضمات عرضی پر سماعت پوری نہیں ہوسکی اور اب 16جون کو اگلی سماعت ہوگی۔

اس سے قبل ایم پی۔ ایم ایل اے خصوصی عدلات نے کانگریس لیڈر کی ضمانت عرضی یکم جون کو خارج کردی تھی۔ اس کے بعد انہوں نے ہائی کورٹ میں ضمانت کی عرضی داخل کی ہے۔ کانگریس لیڈر کی دلیل ہے کہ ان کا بس فہرست تنازع میں کوئی کردار نہیں ہے۔ انہیں سیاسی وجوہات سے پھنسایا گیا ہے۔

اس درمیان ریاستی کانگریس کے میڈیا کوآرڈینیٹر للن کمار نے بتایا کہ مسٹر للو کی ضمانت عرضی پر الہ آباد ہائی کورٹ کی لکھنؤ بنچ میں سماعت ہوئی جس میں ضمانت پر اگلی سنوائی کی تاریخ 16جون رکھی گئی ہے۔انہوں نے کہا کہ جس طرح سے عدالت میں معاملے کو سرکاری وکیل کی جانب سے بار بار ٹالا جارہا ہے وہ کافی مایوس کن ہے۔اس سے حکومت کا غریب ومزدور مخالف رویہ صاف طور سے جھلک رہا ہے۔

انہوں نے کہا کہ کانگریس کا ایک ایک سپاہی 'سیوا ستیہ گرہ' کے ذریعہ سڑک پر تحریک چلائے گا۔ للو کی رہائی کے لئے جیل بھرو تحریک جلد ہی شروع کی جائےگی۔