یوپی: مزدوروں سے بھری بس میں ٹرک نے ماری ٹکر، 4 افراد کی موت، 20 زخمی

بارہ بنکی: اتر پردیش میں بارہ بنکی کے رام نگر تھانہ علاقے میں ہفتہ کی صبح ایک دلخراش سڑک حادثہ پیش آیا، جس میں 4 افراد ہلاک جبکہ 20 سے زیادہ زخمی ہو گئے۔ حادثہ علی الصبح تقریباً ساڑھے تین بجے پیش آیا۔ حادثہ کی اطلاع موصول ہوتے ہی رام نگر تھانہ کی پولیس موقع پر پہنچی اور زخمیوں کو اسپتال پہنچایا۔

پولیس ذرائع نے بتایا کہ نیپال سے گوا جارہی ڈبل ڈیکر بس رام نگر علاقہ میں پنکچر ہو گئی۔ ڈرائیور ٹائر بدلنے لگا اور کچھ مسافر بس سے اتر کر چلنے لگے۔ اسی دوران تیز رفتار ٹرک نے بس کو پیچھے سے ٹکر مار دی۔ زخمیوں کو ضلع اسپتال لے جایا گیا، جہاں 6 کی حالت نازک ہونے کی وجہ سے انہیں لکھنؤ کے ٹراما سینٹر بھیج دیا گیا۔

ضلع اسپتال کے ڈاکٹر امت کمار پانڈے نے بتایا کہ 6 شدید طور پر زخمی افراد کو ٹراما سینٹر لکھنؤ کے لئے ریفر کیا گیا ہے۔ جبکہ ایس ایس پی پورنیندو کے مطابق حادثہ میں 4 افراد ہلاک ہوئے ہیں، چھ کو ریفر کیا گیا ہے اور بقیہ زخمیوں کا علاج کیا جا رہا ہے۔ تمام مہلوکین کی لاشوں کو پوسٹ مارٹم کے لئے بھیج دیا گیا ہے۔

رپورٹ کے مطابق بس میں تقریباً 80 مسافر سوار تھے اور سبھی کا تعلق نیپال سے ہے جو مزدوری کے لیے گوا جا رہے تھے۔ محفوظ افراد اور معمولی زخمیوں کو ابتدائی طبی امداد کے بعد واپس نیپال بھیجنے کے انتظامات کیے جا رہے ہیں۔

(یو این آئی ان پٹ کے ساتھ)