یونیورسٹی اسپیشل ای وی بسیں ادھورا قدم، طلبا کا ڈی ٹی سی پاس میٹرو میں بھی قبول ہو: دہلی کانگریس

نئی دہلی: کانگریس نے دہلی کی وزیر اعلیٰ ریکھا گپتا کی جانب سے شروع کی گئی ’یونیورسٹی اسپیشل ای وی بس سروس‘ کو ایک ادھورا قدم قرار دیا ہے۔ دہلی کانگریس کا کہنا ہے کہ آج کے دور میں جب دہلی میٹرو طلبا کی زندگی کی بنیادی ضرورت بن چکی ہے، تو صرف بس سروس شروع کرنا ان کی حقیقی ضرورتوں کو پورا نہیں کرتا۔

دہلی کانگریس کے سینئر ترجمان ڈاکٹر نریش کمار نے اس تعلق سے اپنی بات رکھتے ہوئے کہا کہ دہلی میں بی جے پی کی ٹرپل انجن حکومت ہے، اس لیے طلبا کے ڈی ٹی سی (دہلی ٹرانسپورٹ کارپوریشن) پاس کو دہلی میٹرو میں بھی قابلِ قبول ہونا چاہیے، تاکہ طلبا ایک ہی پاس سے بس اور میٹرو دونوں میں سفر کر سکیں۔ انہوں نے مزید کہا کہ دہلی یونیورسٹی کے نارتھ اور ساؤتھ کیمپس کے درمیان، اور کالجوں تک پہنچنے کے لیے میٹرو سے فیڈر شٹل سروسز چلانا ضروری ہے۔ یہ قدم طلبا کی سلامتی اور سہولت دونوں کے لیے لازمی ہے۔

ڈاکٹر نریش کمار نے بتایا کہ اس حوالے سے انہوں نے وزیر اعلیٰ کو ایک میمورنڈم پیش کیا ہے، جس کی ایک کاپی لیفٹیننٹ گورنر وی کے سکسینہ کو بھی بھیجی گئی ہے۔ ڈاکٹر نریش کہتے ہیں کہ ’’صرف یونیورسٹی اسپیشل بسیں چلانا طلبا کے ساتھ ایک ادھورا انصاف ہے۔ اگر حکومت واقعی طلبا کے مفادات کا خیال رکھتی ہے، تو اسے ڈی ٹی سی پاس کو میٹرو میں بھی قابلِ قبول بنانا ہوگا اور فیڈر شٹل سروس کی سہولت کو یقینی بنانا ہوگا۔‘‘