سہ روزہ دورے پر یو اے ای کے وزیر خارجہ کی ہندوستان آمد

نئی دہلی: متحدہ عرب امارات کے وزیر خارجہ شیخ عبد اللہ بن زائد النہیان اتوار کی دیر شام کو سہ روزہ دورے پر ہندوستان پہنچے ہیں۔

سرکاری ذرائع کے مطابق وہ یہاں اپنے ہم منصب ڈاکٹر ایس جے شنکر سے دو طرفہ مذکرات کریں گے۔ 4 جولائی کو وزارت خارجہ نے ایک بیان میں کہا کہ اس دورے کا مقصد باہمی اہم اسٹریٹجک شراکت داری کو مزید مستحکم کرنے کے لیے دوطرفہ تعاون کے نئے شعبوں کو پرکھنے کے مواقع تلاش کرنا ہے۔

قابل ذکر ہے کہ وزیر اعظم نریندر مودی اگست 2015 میں اس وقت یو اے ای کا دورہ کیا تھا جب دونوں ملکوں نے باہمی تعلقات کو اہم اسٹریٹجک شراکت دار کے طور پر فروغ دینے کا فیصلہ کیا تھا۔ مودی نے فروری 2018 میں بھی یو اے ای کا دورہ کیا تھا۔

ابو ظہبی کے ولیعہد شہزادہ شیخ محمد بن زائد النہیان فروری 2016 میں ہندوستان کا دورہ کرچکے ہیں۔ انہوں نے جنوری 2017 میں بھی ہندوستان کا دورہ کیا تھا جب وہ یوم جمہوریہ کی تقریبات میں مہمان خصوصی تھے۔

بیان میں کہا گیا کہ ہندوستان اور یواےای کے درمیان دو طرفہ معاشی، مذہبی، ثقافتی، تاریخی اور کثیر جہتی تعلقات ہیں جو اہم اسٹریٹجک شراکت داری کو مزید فروغ دینے کی حوصلہ افزائی کرتے ہیں۔ یو اے ای ہندوستان کا تیسرا بڑا تجارتی شراکت دار اور چوتھا بڑا انرجی سپلائر ہے۔ یو اے ای پہلا ملک ہے جو ہندوستان کے اسٹریٹجک پٹرولیم ریزروس پروگرام میں شراکت دار ہے۔ وزارت خارجہ نے کہا کہ 33 لاکھ ہندوستانیوں کا دوسرا گھر ہے جو یو اے ای کی ترقی میں حصہ دار ہیں۔

تنظیم تعاون اسلامی (او آئی سی) کے سربراہ کی حیثیت یو اے ای نےمارچ 2019 کو ابوظہبی میں او آئی سی کے وزرائے خارجہ کی کونسل کی 46 ویں میٹنگ میں ہندوستان کو اعزازی مہمان کے طور پر مدعو کیا تھا جس میں سابق وزیر خارجہ سشما سوراج نے شرکت کی تھی۔ پیر کو یو اے ای کے وزیر خارجہ ہندوستانی کمپنیوں کے سی ای اوز سے بزنس راؤنڈ ٹیبل پرگفتگو بھی کریں گے۔ ذرائع کے مطابق بعد ازاں وہ دن میں وزیر اعظم نریندر مودی سے ملاقات بھی کریں گے۔