ڈانڈیا دیکھنے گئے سہیل اور سیفی، خواتین کو ہراساں کرنے کے بعد پولیس نے گرفتار کر لیا

کانپور کے چکری علاقے میں پیر کی رات ایک ڈانڈیا تقریب میں افراتفری مچ گئی۔ جگدمبا گیسٹ ہاؤس میں ہونے والی تقریب میں سینکڑوں لوگ روایتی لباس میں ملبوس ڈانڈیا سے لطف اندوز ہو رہے تھے۔ رنگ برنگی روشنیوں اور ڈھول کی تھاپ کے درمیان خواتین اور لڑکیاں رقص کر رہی تھیں۔ اس دوران دو نوجوان بھیڑ میں خواتین کو  ہراساں کرتے اور نازیبا تبصرہ کرتے ہوئے پکڑے گئے۔

لوگوں نے انہیں رنگے ہاتھوں پکڑ لیا اور فوری طور پر تقریب میں موجود خاتون پولیس افسر کو اطلاع دی۔ جب ان سے پوچھ گچھ کی گئی تو دونوں نوجوانوں نے اپنے ڈانڈیا پاس پیش کیے اور بہانہ بنانے کی کوشش کی۔ ابتدائی طور پر ماحول کشیدہ ہوگیا تاہم باریک بینی سے تفتیش کرنے پر معلوم ہوا کہ دونوں نوجوانوں کے نام سہیل اور سیفی بتائے گئے ۔

پولس کی مزید تفتیش پر یہ بات سامنے آئی کہ دونوں افراد کسی طرح اپنے آدھار کارڈ میں ردوبدل کرکے رجسٹریشن کروانے اور ڈانڈیا تقریب میں داخلہ حاصل کرنے میں کامیاب ہوگئے تھے۔ یہ اطلاع ملتے ہی تقریب میں موجود لوگ اور منتظمین حیران رہ گئے۔ ڈانڈیا کمیٹی کے عہدیداروں نے بتایا کہ رجسٹریشن ہمیشہ مکمل جانچ پڑتال کے بعد کی جاتی ہے، لیکن دونوں افراد نے داخلہ حاصل کرنے کے لیے اپنی شناخت چھپائی تھی۔

ڈی سی پی ستیہ جیت گپتا نے واقعہ کی تصدیق کرتے ہوئے کہا کہ دونوں افراد کو خواتین کو ہراساں کرنے اور فحش تبصرے کرنے کے الزام میں گرفتار کیا گیا ہے۔ پولیس کا کہنا ہے کہ قانون کے مطابق کارروائی کی جائے گی۔ (بشکریہ نیوز پورٹل ’آج تک‘)