حضرت نظام الدین واقع پتّے شاہ درگاہ احاطہ میں اندوہناک حادثہ، چھت گرنے سے 6 افراد ہلاک، کئی افراد ملبہ میں دبے

دہلی کے حضرت نظام الدین علاقہ میں 15 اگست کی سہ پہر خوفناک حادثہ پیش آیا، جس میں کم از کم 6 جانیں تلف ہو گئی ہیں۔ پہلے 5 افراد کی ہلاکت سے متعلق تصدیق ہوئی تھی، لیکن بعد میں مزید ایک موت کی تصدیق ہو گئی۔ واقعہ ہمایوں کی قبر کے پیچھے موجود پتّے شاہ درگاہ میں پیش آیا، جہاں کمرے کی چھت اور اس سے ملحق ایک دیوار منہدم ہو گئی۔ جب چھت گری تو وہاں کم و بیش 16 افراد موجود تھے، جو ملبہ میں دب گئے۔

اس حادثہ کے بعد وہاں چیخ و پکار مچ گئی۔ لوگوں کی آواز سن کر قریب میں موجود لوگ اور پولیس والے فوراً وہاں پہنچے۔ فائر بریگیڈ محکمہ کو بھی حادثہ کی اطلاع فوراً دے دی گئی۔ خبر ملتے ہی جائے وقوع پر پہنچی فائر بریگیڈ کی ٹیم نے ریسکیو مہم شروع کی اور ملبہ میں دبے لوگوں کو نکال کر ایمس پہنچانا شروع کیا۔ کم و بیش 15 لوگوں کو اسپتال لے جایا گیا جن میں سے 5 کو ڈاکٹروں نے مردہ قرار دے دیا۔ دیگر زخمی افراد کا علاج شروع ہو چکا ہے۔ مہلوکین میں 3 خواتین اور 3 مرد شامل بتائے جا رہے ہیں۔

تازہ ترین اطلاع کے مطابق دہلی پولیس اور فائر بریگیڈ کی ٹیم ریسکیو آپریشن جاری رکھے ہوئی ہے۔ پولیس اور فائر بریگیڈ نے بتایا کہ پتّے شاہ درگاہ احاطہ میں موجود ایک کمرے کی چھت گرنے کے سبب یہ حادثہ پیش آیا۔ ملبہ کو مستقل ہٹایا جا رہا ہے۔ 15 سے 16 لوگوں کے دبے ہونے کی اطلاع ملی تھی، ان میں سے 5 لوگوں کی موت واقع ہو گئی ہے۔

کچھ میڈیا رپورٹس میں بتایا جا رہا ہے کہ ریسکیو آپریشن میں این ڈی آر ایف کی بھی مدد لی گئی ہے۔ چونکہ ملبہ کافی زیادہ جمع ہو گیا تھا، اس وجہ سے فائر بریگیڈ ٹیم کو بہت وقت لگ رہا تھا۔ حالات کو پیش نظر رکھتے ہوئے این ڈی آر ایف کو بلایا گیا جس کے ساتھ ’سنیپر ڈاگ‘ بھی تھا۔ اس سے ملبہ میں دبے لوگوں کی تلاش آسان ہو گئی۔