یوپی میں زہریلی فضا! نوئیڈا اور غازی آباد میں اے کیو آئی 400 سے تجاوز، راحت کے آثار نہیں

قومی راجدھانی دہلی، این سی آر سمیت شمالی ہند میں سردی اور کہرے کا ستم بڑھتا جا رہا ہے۔ سرد لہر کی وجہ سے مختلف ریاستوں کے کم سے کم درجہ حرارت میں گراوٹ دیکھی جا رہی ہے، جبکہ سردی کے ساتھ ساتھ ہوا بھی انتہائی آلودہ نظر آ رہی ہے۔ یوپی کی راجدھانی لکھنؤ، وارانسی اور پریاگ راج سمیت بڑے شہروں کی ہوا زہریلی ہو گئی ہے جس سے لوگوں کو سانس لینے میں پریشانی ہو رہی ہے۔

لکھنؤ میں آج (جمعرات) صبح کی شروعات دھند اور سرد لہر کے ساتھ ہوئی۔ سردی کے ساتھ ساتھ یہاں کی ہوا بھی آلودہ ہے۔ یہاں کا اے کیو آئی مسلسل 200-300 کے درمیان برقرار ہے جو اورینج زمرے میں آتا ہے اور یہ ہوا خراب مانی جاتی ہے جو لوگوں کی صحت کے لیے اچھی نہیں ہے۔

لکھنؤ کے لال باغ علاقے میں فضائی آلودگی کی سطح آج صبح 7 بجے 281 ریکارڈ کی گئی، جو کہ خراب زمرے میں آتی ہے اور ریڈ زون کے کافی قریب پہنچ گئی ہے۔ وہیں تالکٹورہ انڈسٹریل سینٹر میں بھی ہوا کے معیار کا اشاریہ 249 رہا اور کیندریہ ودیالیہ کے آس پاس اے کیو آئی 213 ہے۔

اسی طرح وارانسی اور پریاگ راج میں بھی گزشتہ کئی روز سے ہوا کا معیار خراب زمرے میں ہے۔ نومبر کے آغاز سے ہی آلودگی کی سطح بڑھی ہوئی ہے۔ ان اضلاع میں فضائی آلودگی کی سطح 150 سے 250 کے درمیان رہی جو کہ درمیانے سے خراب زمرے میں آتی ہے۔ اس صورتحال سے شہری علاقے سب سے زیادہ متاثر ہیں۔ پریاگ راج کے جھونسی میں آج اے کیو آئی 165 ریکارڈ  کیا گیا جبکہ وارانسی میں اے کیو آئی تقریباً 150 رہا۔

قومی راجدھانی دہلی سے متصل غازی آباد، نوئیڈا، گریٹر نوئیڈا، میرٹھ اور ہاپوڑ میں بھی ہوا کا معیار بدستور انتہائی خراب زمرے میں ہے۔ نوئیڈا کے سیکٹر 125 میں آج صبح اے کیو آئی 366 اور سیکٹر 116 میں 406 ریکارڈ کیا گیا جو سنگین زمرے میں آتا ہے۔ اس دوران غازی آباد کے لونی میں اے کیو آئی 434، اندرا پورم 389 اور گریٹر نوئیڈا میں 388 ریکارڈ کیا گیا۔

اس کے علاوہ اتر پردیش کے باغپت میں اے کیو آئی 313، ہاپوڑ میں 377، میرٹھ کے پلوپورم میں 326، مظفر نگر میں 357 ریکارڈ کیا گیا۔ ماہرین کے مطابق فی الحال فضائی آلودگی سے لوگوں کو کوئی راحت ملنے والی نہیں ہے۔ محکمہ موسمیات نے آنے والے دنوں میں کہرا اور سردی میں اضافے کی وارننگ دی ہے جس سے اس پریشانی میں مزید اصافہ ہو سکتا ہے۔