’ آج ہندوستان میں کچھ اعلیٰ عہدوں پر وراجمان ہیں محروم طبقے کے لوگ، یہ بابا صاحب کی دَین ہے‘: چیف جسٹس گوائی

 چیف جسٹس آف انڈیا بی آر گوئی نے کہا ہے کہ آج ہندوستان میں محروم طبقوں کے نمائندے ملک کے کچھ اعلیٰ عہدوں پر ہیں، جو ڈاکٹر بی آر امبیڈکر کے مساوات، آزادی، انصاف اور بھائی چارے کے خواب کی سچی تصویر ہے۔ سی جے آئی نے یہ باتیں جمعرات کی شام لندن کے تاریخی ’گریج اِن‘ میں ہندوستانی آئین کے 75 سال پورا ہونے کے موقع پر خصوصی لکچر دیتے ہوئے کہیں۔

گوائی نے کہا کہ یہیں پر ڈاکٹر امبیڈکر نے قریب 100 سال پہلے انگلینڈ میں بیرسٹر کی ڈگری حاصل کی تھی۔ اس موقع پر انہوں نے ڈاکٹر امبیڈکر کی وراثت کو یاد کیا اور کہا کہ وہ نہ صرف آئین کے اہم معمار تھے بلکہ سماجی انصاف کے عظیم مصلح بھی تھے۔

اپنی تقریر کے دوران گوائی نے کہا کہ یہ ان کے لیے ایک جذباتی لمحہ ہے، کیونکہ وہ بھی اسی دلت سماج سے آتے ہیں جس سے ڈاکٹر امبیڈکر کا تعلق تھا۔ انہوں نے کہا کہ آج ملک میں کئی اہم آئینی عہدوں پر محروم طبقوں کے لوگ بیٹھے ہیں، جو بابا صاحب کے خواب کو شرمندۂ تعبیر کرنے کی سمت میں بڑی بات ہے۔ انہوں نے کہا کہ اس تاریخی ادارے میں کھڑے ہوکر مجھے ڈاکٹر امبیڈکر کی وہ پائیدار وراثت یاد آ رہی ہے جو انہوں نے نہ صرف قانون کے شعبہ میں بلکہ ہندوستانی جمہوریت کی بنیاد میں چھوڑی ہے۔

گوائی نے آگے کہا، ’’میں 1960 میں پیدا ہوا، جب ڈاکٹر امبیڈکر ہمیں چھوڑ کر جا چکے تھے۔ لیکن میں ہندوستان کا شہری بن کر پیدا ہوا، نہ کہ ایک اچھوت بن کر۔ بچپن سے ہی گھر میں ان کی بہادری، عقلمندی اور برابری کی جدوجہد کی کہانیاں سنتا آیا ہوں۔ یہ باتیں میرے خیالات اور (زندگی) مقصد کا حصہ بن گئیں۔‘‘

گوائی نے کہا کہ ڈاکٹر امبیڈکر کا خواب تھا کہ سماج میں ہر شہری کو آئین سے پورا تحفظ اور حق ملے۔ یہ خواب آج عدلیہ، مقننہ اور حکومت کے کاموں کے ذریعہ رفتہ رفتہ تعبیر ہو رہا ہے۔

انہوں نے کہا کہ یہ فخر کی بات ہے کہ ہمارے ملک نے گزشتہ 75 برسوں میں دو خاتون صدر جمہوریہ کو دیکھا ہے اور اب ہمارے پاس ایک خاتون صدر جمہوریہ (دروپدی مرمو) ہیں، جو سماج کے سب سے حاشیے پر رہنے والے طبقے (قبائلی برادری) کی نمائندگی کرتی ہیں اور مجھے یہ کہتے ہوئے فخر ہو رہا ہے کہ ہندوستان کے چیف جسٹس (خود گوائی) بھی محروم طبقہ اور عام علاقے سے آتے ہیں۔