ملک میں 56 انچی سینے والی نہیں بلکہ عوام کو دبانے والی کمزور حکومت ہے: پرینکا

بارہ بنکی: وزیراعظم نریندر مودی کا نام لئے بغیر کانگریس کی جنرل سکریٹری پرینکا گاندھی نے طنز کیا کہ عوام کی آواز کو دبانے والی بھارتیہ جنتا پارٹی (بی جے پی) حکومت چھپن انچ کے سینے والی نہیں بلکہ کمزور حکومت ہے۔

پرینکا گاندھی نے کانگریس کے سینئر لیڈر پی ایل پونیا کے بیٹے اور پارٹی کے امیدوار تنج پونیا کی حمایت میں فتح پور میں منعقدہ عوامی جلسہ سے کہا کہ بی جے پی حکومت نے جمہوریت کو کمزور کیا ہے۔ عوام حق مانگتے ہیں تو انہیں جیل میں ڈالا جاتا ہے۔ عوام کی آواز دبائی جاتی ہے۔ یہ چھپن انچ کے سینے والی نہیں بلکہ کمزور حکومت ہے۔ آپ ووٹ کے ذریعہ انہیں تبدیل کیجئے۔

انہوں نے کہا کہ یہ جملہ والی حکومت ہے۔ جملوں کے علاوہ ملک کے عوام کو کچھ حاصل نہیں ہوا ہے۔ اس بار ان جملہ بازوں کو حکومت سے ہٹائیں۔ پی ایم کے پاس اپنے حلقہ وارانسی کے عوام سے بات چیت کرنے کا وقت نہیں تھا۔ گاوں کے غریب کسان پی ایم کا انتظار ہی کرتے رہے۔

کانگریس کے جنرل سکریٹری نے کہا کہ اس حکومت میں تشہیر تو بہت ہورہی ہے، وزیراعظم کی فوٹو بھی نظر آتی ہے۔ یہ پھیلا یا جارہا ہے کہ پہلے ملک میں کچھ ہوا ہی نہیں۔ کسان جانوروں سے پریشان ہیں۔ کسانوں کے انشورنس کا فائدہ صنعت کاروں کو مل رہا ہے، کسانوں کا قرض معاف کرنے کا پیسہ نہیں ہے لیکن صنعت کاروں کے قرض معاف کرنے کا پیسہ ہے۔ وزیراعظم کے بڑے بڑے انٹرویو آرہے ہیں، پر وہ کسی غریب کے گھر نہیں گئے۔

پرینکا گاندھی نے کہاکہ ہم نے سابق وزیر خزانہ سے مشورہ اور تحقیق کرنے کے بعد ’نیائے یوجنا‘ کو نافذ کرنے کا فیصلہ کیا ہے۔ ہر غریب کو 72000روپے کی مدد سے ملک میں روزگار کے وسائل بڑھیں گے ساتھ ہی غریبی کو دور کیا جاسکے گا۔ انہوں نے رائے دہندگان سے اپیل کی کہ وہ ایسے لیڈر کو لائیں جو ان کے مسائل کی بات کرے اور انہیں حل کرے۔

پرینکا نے عوامی جلسہ کے بعد معروف صوفی حاجی وارث علی شاہ کی درگاہ دیوا شریف کی زیارت کی اور کانگریس کی جیت کے لئے دعا مانگی۔ اس کے بعد انہوں نے تنج پونیا کی حمایت میں ہیڈکوارٹر تک روڈ شو کیا۔