’جملوں کی بارش کرنے آ رہے ہیں وزیر اعظم‘، بہار دورہ سے قبل تیجسوی یادو نے نریندر مودی پر کسا طنز

وزیر اعظم نریندر مودی کے 15 ستمبر کو ہونے والے بہار دورہ سے قبل بہار کے سابق وزیر اعلیٰ اور راشٹریہ جنتا دل (آر جے ڈی) کے رہنما تیجسوی یادو نے رد عمل کا اظہار کیا ہے۔ اتوار (14 ستمبر) کو نامہ نگاروں سے بات کرتے ہوئے انہوں نے کہا کہ ’’وزیر اعظم پھر جملوں کی بارش کرنے آ رہے ہیں۔‘‘ ساتھ ہی انہوں نے کہا کہ وزیر اعظم کبھی مسائل پر بات نہیں کرتے، انتخاب کا وقت ہے صرف درانداوزوں کی بات کرتے ہیں۔

آر جے ڈی لیڈر نے کہا کہ ’’وزیر اعظم جملے کی بارش کرنے آ رہے ہیں۔ کوئی ترقیاتی کام نہیں ہو رہا ہے۔ وزیر اعظم کسی حقیقی مسئلہ پر نہیں بولیں گے۔ وہ صرف دراندازوں کے بارے میں باتیں کریں گے۔ وہ بہار کی ترقی یا غریبوں کی زندگی کو بہتر بنانے کے بارے میں بات نہیں کریں گے۔‘‘ ساتھ ہی انہوں نے کہا کہ ’’وزیر اعظم پورنیہ آ رہے ہیں، ہو سکتا ہے وہ وہاں میڈیکل کالج بھی جائیں، ساتھ میں میرے چاچا (نتیش کمار) کو بھی لے جائیں، وہ دیکھیں گے کہ حقیقت کیا ہے۔‘‘

واضح ہو کہ 13 ستمبر کی رات اچانک تیجسوی یادو پورنیہ کے گورنمنٹ میڈیکل کالج اینڈ ہاسپٹل پورنیہ پہنچے تھے۔ اس دوران انہوں نے وہاں زیر علاج مریضوں سے بات چیت کی اور پورے اسپتال کا معائنہ کیا۔ ان کو رات کے وقت اچانک اسپتال میں دیکھ کر انتظامیہ حیران رہ گئی۔ اسپتال کے اچانک معائنے کے دوران تیجسوی یادو نے اسپتال کے انتظامات پر ناراضگی کا اظہار کرتے ہوئے ریاستی حکومت پر جم کر حملہ بولا۔ انہوں نے کہا کہ ’’این ڈی اے حکومت کے 20 سالوں میں بہار میں صحت کے نظام کی حالت بے حد خراب ہو گئی ہے۔‘‘