ملک کی آن، بان، شان، عزت و احترام پر آنچ نہیں آنے دی جائے گی: راجناتھ سنگھ

جودھ پور: وزیر دفاع راج ناتھ سنگھ نے باشندگان وطن کو یقین دلاتے ہوئے کہا کہ کسی بھی حد تک جانا پڑے ہندوستان کی آن، بان، شان، عزت اوراحترام پر کوئی آنچ نہیں آنے دی جائے گی۔ راجناتھ سنگھ آج جودھ پور ضلع کے سالوا کلاں میں ہمت، بہادری اور عقیدت کی علامت ویر درگا داس راٹھور کے مجسمے کی نقاب کشائی کے موقع پر منعقدہ ایک پروگرام سے خطاب کر رہے تھے۔

راجناتھ سنگھ نے کہا کہ بہت سے لوگ غلط فہمی پیدا کرنے کی کوشش کرتے ہیں اور کہہ رہے ہیں کہ چین نے یہ کر دیا، وہ کر دیا، سرحدوں کی حفاظت کیسے کی جاتی ہے۔ انہوں نے کہا کہ ایسی باتیں کرنے والی سیاسی جماعتوں کو جہاں ملک کی عزت واحترام کی بات آتی ہو وہاں سیاست نہیں کرنی چاہیے۔

انہوں نے کہا کہ کوئی بھی سیاستدان سرحد پر جا کر سرحدوں کی حفاظت نہیں کرتا، ان ماؤں کی کوکھ سے جنم لینے والے ان سرحدوں کی حفاظت کر رہے ہیں اور موقع آنے پر وہ اپنی جان قربان کر دینے میں بھی پیچھے نہیں ہٹتے اور ملک کی سرحد میں کسی کو گھسنے نہیں دیتے۔ انہوں نے ویر درگا داس کی قربانی کو یاد کرتے ہوئے کہا کہ سیاست اقتدار بنانے کے لیے نہیں کی جاتی، سیاست سماج اور ملک کی تعمیر کے لیے کی جاتی ہے۔

راجناتھ سنگھ نے وزیر اعظم نریندر مودی کے سینے کو 56 انچ چوڑا بتاتے ہوئے کہا کہ انہوں نے ملک کی عزت کا پورا خیال رکھا اور اس پر کبھی آنچ نہیں آنے دی۔ انہوں نے کہا کہ پہلے ملک کا سیکورٹی سرکل اتنا مضبوط نہیں تھا لیکن آج سیکورٹی کا دائرہ پہلے سے زیادہ مضبوط ہوا ہے اور ہندوستان کا شمار کمزور ممالک میں نہیں، طاقتور ممالک میں ہوتا ہے۔