بدلنے والا ہے ’جی میل‘ کا ڈیزائن، استعمال میں ہوگا اب اور بھی آسان

گوگل نے اعلان کیا ہے کہ بہت جلد ’جی میل‘ کا نیا ڈیزائن صارفین کے سامنے پیش کیا جائے گا۔ کمپنی کا کہنا ہے کہ ’گوگل ورک اسپیس‘ کے نئے منصوبہ کو دیکھتے ہوئے جی میل کو نئے ڈیزائن کے ساتھ پیش کرنے کا فیصلہ لیا گیا ہے۔ اس نئے ڈیزائن کے بعد صارفین کے لیے اس کا استعمال کرنا مزید آسان ہو جائے گا۔ یہ بھی بتایا جا رہا ہے کہ جی میل صارفین کو گوگل چیٹ، گوگل میٹ اور گوگل اسپیس ایک ہی جگہ پر حاصل ہوگا۔

نئے جی میل کے تعلق سے بتایا گیا ہے کہ صارفین کو ایک انٹگریٹیڈ ویو ملے گا۔ ری ڈیزائن جی میل سبھی صارفین کو سال 2022 کی دوسری سہ ماہی میں مل جائے گا۔ یعنی آپ کو جی میل کا نیا انٹرفیس اس سال جولائی سے پہلے دیکھنے کو مل سکتا ہے۔ گوگل ورک اسپیس کے مطابق ورک اسپیس صارفین 8 فروری سے نئے ڈیزائن کی ٹیسٹنگ کر سکیں گے۔ نئے ڈیزائن میں صارفین کو چار بٹن ملیں گے جس کی مدد سے وہ میل، چیٹ، اسپیس اور میٹ میں آسانی سے سوئچ کر سکیں گے۔ ابھی صارفین کو جی میل، چیٹ اور میٹ کے لیے ایک کمبائنڈ لے آؤٹ ملتا ہے۔

گوگل کا کہنا ہے کہ نئے اَپ ڈیٹ کے بعد صارفین ایک وقت پر صرف ایک بٹن کا ہی اِن لارج ویو دیکھ سکیں گے۔ اس کے ساتھ ہی نئے انٹرفیس میں صارفین کو نوٹیفکیشن ببل بھی ملیں گے جو انھیں دوسرے ٹیبس کی بھی جانکاری دیں گے۔ گوگل کے مطابق جن صارفین نے نئے لے آؤٹ کے لیے اَپ ڈیٹ کر لیا ہے، انھیں نئے آپشنز جلد نظر آنے لگیں گے۔

واضح رہے کہ ورک اسپیس میں ہونے والی تبدیلی کا اعلان گزشتہ سال ستمبر میں کیا گیا تھا۔ ان میں سے ایک فیچر کی مدد سے صارف بغیر گوگل میٹ کے بھی دوسرے جی میل صارف سے وَن ٹو وَن کالس کر سکتے ہیں۔ گوگل نے بتایا کہ جن لوگوں کو جی میل کا نیا لے آؤٹ نہیں ملا ہے، وہ اپریل سے اس میں شفٹ ہو سکیں گے۔ گوگل کا کہنا ہے کہ مستقل تبدیلی سے قبل جی میل صارفین کو پرانے لے آؤٹ میں واپسی کا موقع ملے گا، لیکن سال 2022 کی دوسری سہ ماہی کے آخر تک اس فیچر کو مستقل کر دیا جائے گا۔ یعنی جلد ہی آپ نئے جی میل کا تجربہ کر سکیں گے۔