بیٹی نے مسلمان سے کی شادی، تو لواحقین نے کیا ’پنڈ دان‘

جبل پور: مدھیہ پردیش کے جبل پور میں ایک مسلم نوجوان کے ساتھ ہندو بیٹی کی شادی پر اہل خانہ اس قدر ناراض ہوئے کہ انہوں نے بیٹی کے زندہ رہتے ہوئے نہ صرف ’پنڈ دان‘ کیا بلکہ مِرتیو بھوج (انتقال کے بعد کی جانے والی دعوت) کا اہتمام بھی کیا۔ معاملہ امکھیرا علاقہ میں رہنے والی ایک نوجوان لڑکی سے متعلق ہے۔

انامیکا نامی لڑکی نے محمد ایاز نامی نوجوان سے شادی کی اور اپنا نام عظمیٰ فاطمہ رکھا لیا۔ بیٹی کے اس فیصلے سے پورا خاندان بہت ناراض ہوا اور انہوں نے بیٹی کو عمر بھر کے لیے بھلانے کے لیے پنڈ دان ​​کیا۔ اس کے لیے لواحقین نے تعزیتی پیغامات تقسیم کیے اور پنڈدان کی تقریب کا اہتمام کرتے ہوئے لوگوں کو مدعو کیا۔

اہل خانہ کی جانب سے لواحقین میں تقسیم کیے گئے تعزیتی پیغام میں بیٹی کو ’کو پتری‘ (نالائق بیٹی) قرار دیتے ہوئے لکھا گیا کہ انتہائی افسوس کے ساتھ یہ اطلاع دی جا رہی ہے کہ انامیکا دوبے کا 2 اپریل کو انتقال ہو گیا ہے۔ 11 جون کو ’پنڈ دان‘ کیا جائے گا۔ اہل خانہ نے تعزیتی خط میں اپنی بیٹی کو ’نرک گامی‘ (جہنم رسید) لکھا۔

انامیکا کے اہل خانہ نے بتایا ہے کہ دریائے نرمدا کے کنارے واقع گواری گھاٹ پر پنڈدان کی رسومات کا اہتمام کیا گیا۔ رشتہ داروں کا کہنا تھا کہ انامیکا ان کے گھر میں سب سے زیادہ لاڈلی تھی اور اس کی پرورش بھی بہتر انداز میں ہوئی تھی لیکن اس نے غیر مذہب کے نوجوان سے شادی کر کے پورے خاندان کو معاشرے کے سامنے رسوا کیا ہے۔ اب اس کا خاندان کے لیے زندہ رہنے کا کوئی مطلب نہیں، انامیکا کے اس فعل نے پورے خاندان کے خواب چکنا چور کر دیے۔

شادی سے پہلے اس معاملے پر ہندو تنظیموں نے احتجاج بھی کیا تھا اور پولیس میں شکایت بھی درج کرائی تھی، ساتھ ہی اس معاملے کو لو جہاد سے بھی جوڑا تھا، لیکن تحقیقات کے بعد پولس نے پورے معاملے میں مسلم نوجوان کو کلین چٹ دے دی۔