مہاراشٹر: شراب کی بھٹیوں پر چھاپہ مارنے گئی پولس کی ٹیم پر حملہ، چھ زخمی

تھانے: مہاراشٹر کے تھانے ضلع کے ساہوپور تعلقہ میں پولس اہلکاروں اور ہوم گارڈ کے جوانوں پر ہتھیاروں سے لیس بھیڑ نے اس وقت حملہ کردیا، جب یہ ٹیم شراب کی بھٹیوں پر چھاپے مارنے گئی جس سے چھ پولس اہلکار زخمی ہوگئے اور ان کی گاڑی کو نقصان پہنچا۔ پولس نے جمعرات کو یہ اطلاع دی۔

ڈپٹی پولس سپرنٹنڈنٹ دلیپ گوڈ بولے نے یو این آئی کو بتایا کہ پولس کی ٹیم کے ساتھ ہوم گارڈ کے جوان شراب کی بھٹیوں پر چھاپہ مارنے کے لئے بدھ کو سرلامبا گاؤں گئے تھے۔ انہوں نے بتایا کہ ہتھیاروں سے لیس 35 لوگوں کی بھیڑ جن میں زیادہ تر خواتین تھیں، ٹیم پر حملہ کردیا۔ پولس اہلکار ندی کے کنارے شراب کی بھٹیوں پر چھاپے مار رہی تھی تبھی بھیڑ نے ان پر حملہ کردیا۔ حملہ آوروں کے پاس دھاردار ہتھیار تھے۔ بھیڑ نے ٹیم پر پتھراؤ بھی کیا۔

گوڈ بولے نے بتایا کہ ’’بھیڑ نے اٹھائیس سالہ سب انسپکٹر کے این والپ اور ہوم گارڈ کے جوان سنتوش ہومنے پر کلہاڑی سے حملہ کردیا اور انہیں سنگین چوٹیں آئی ہیں۔ دونوں کو اسپتال میں بھرتی کرایا گیا ہے۔ ڈپٹی پولس کمشنر نے بتایا کہ اس کے علاوہ ایک دو کانسٹبل اور ہوم گارڈ کے جوان بھی حملے میں زخمی ہوئے ہیں۔ پولس نے یہ بھی بتایا ہے کہ مشتعل بھیڑ نے بعد میں پولس کی جیپ پر پتھراؤ کیا جس سے جیپ کے آگے کا شیشہ اورکھڑکی اور وائرلیس آلات کو نقصان پہنچا ہے۔

ڈپٹی پولس کمشنر نے بتایا کہ حملہ آوروں نے ہوم گارڈوں پر اپنا غصہ اتارا کیونکہ پولس کی قیادت میں ہوم گارڈ کے جوانوں نے شراب کے ٹھکانوں پر چھاپہ مارا تھا۔ جائے واقعہ سے بھاگتی خواتین نے ٹیم کو دیکھ لینے کی دھمکی دی تھی۔ پولس نے بھیڑ کے خلاف تعزیرات ہند کی مختلف دفعات کے تحت معاملہ درج کرلیا ہے۔ ابھی تک کسی کی بھی گرفتاری عمل میں نہیں آئی ہے اور جانچ جاری ہے۔