تلنگانہ میں خوفناک سڑک حادثہ، ٹی جی ایس آر ٹی سی بس اور کنٹینر کی ٹکر میں 3 افراد ہلاک، 11 زخمی

تلنگانہ کے محبوب نگر ضلع میں ہفتہ کو ایک المناک سڑک حادثے میں 3 لوگوں کی موت ہوگئی اور 11 دیگر شدید زخمی ہوگئے۔ یہ حادثہ اس وقت پیش آیا جب حیدرآباد سے تروپتی جا رہی تلنگانہ اسٹیٹ روڈ ٹرانسپورٹ کارپوریشن (ٹی جی ایس آر ٹی سی) کی ایک بس اچانک بے قابو ہو کر ڈیوائیڈر پار کرتے ہوئے سامنے سے آ رہے ایک کنٹینر لاری سے ٹکرا گئی۔ حادثے سے علاقے میں افراتفری مچ گئی، پولیس اور مقامی افراد نے جائے وقوعہ پر پہنچ کر امدادی کارروائیاں انجام دیں۔

پولیس کے مطابق حادثہ موسا پیٹ ڈویژن کے کومیریڈی پلی کے قریب پیش آیا۔ بس مبینہ طور پر حیدرآباد سے تروپتی کی طرف جا رہی تھی۔ اچانک ڈرائیور سے بس بے قابو ہو گئی جس کی وجہ سے وہ ڈیوائیڈر پار کر کے مخالف سمت جا پہنچی اور سامنے سے آ رہے کنٹینر لاری سے ٹکرا گئی۔ ٹکر اتنی شدید تھی کہ دونوں گاڑیاں بُری طرح تباہ ہوگئیں۔

حادثے میں کنٹینر لاری کے ڈرائیور اور کلینر کی موقع پر ہی موت ہو گئی جب کہ بس ڈرائیور کو تشویشناک حالت میں اسپتال لے جایا گیا، جہاں وہ زخموں کی تاب نہ لاکر چل بسا۔ پولیس نے بتایا کہ بس میں سوار 11 مسافروں کو فوری طور پر علاج کے لیے محبوب نگر کے سرکاری جنرل اسپتال میں داخل کرایا گیا۔ ڈاکٹروں کا کہنا ہے کہ زخمیوں میں سے متعدد کی حالت نازک ہے۔ حادثے کے بعد بس کے اندر پھنسے مسافروں کو نکالنے کے لیے امدادی کارروائیاں انجام دی گئیں۔ اندر پھنسے کئی مسافروں کو بس کے ایمرجنسی دروازے کے ذریعے باہر نکالا گیا۔ مقامی باشندوں نے بھی امدادی کارروائیوں میں مدد کی، ایمبولینس کے پہنچنے تک زخمیوں کو محفوظ مقام پر منتقل کیا گیا تھا۔

حادثے کی اطلاع ملتے ہی پولیس جائے وقوعہ پر پہنچی اور ٹریفک کو کنٹرول کرتے ہوئے حادثے کی وجوہات جاننے کے لیے تفتیش شروع کردی۔ ابتدائی تحقیقات سے پتا چلتا ہے کہ بس ڈرائیور سے اچانک بے قابو ہوجانے کی وجہ سے حادثہ پیش آیا۔ اس المناک حادثے سے پورے علاقے میں سوگ کی لہر دوڑگئی۔ پولیس نے متوفیوں کی لاشوں کو پوسٹ مارٹم کے لیے بھجوا دیا ہے اور لواحقین کو مطلع کر دیا ہے۔ انتظامیہ نے زخمیوں کے بہترعلاج کے لیے اسپتال کو ضروری ہدایات دی ہیں۔