تلنگانہ کے سنگاریڈی میں کیمیکل فیکٹری میں خوفناک دھماکہ، 10 مزدوروں کی موت، 20 سے زائد زخمی

تلنگانہ کے سنگا ریڈی ضلع کے پاشا میلارام صنعتی علاقے میں پیر کی صبح ایک خوفناک حادثہ پیش آیا۔ یہاں واقع سیگاچی کیمیکل فیکٹری میں زوردار دھماکہ کے بعد شدید آگ لگ گئی۔ فیکٹری کے ری ایکٹر میں دھماکہ ہوا اور دیکھتے ہی دیکھتے آگ کے شعلوں نے پوری فیکٹری کو اپنی زد میں لے لیا۔ حادثے میں اب تک 10 مزدوروں کی موت کی خبر ہے جبکہ 20 سے زائد زخمی ہوئے ہیں۔ زخمیوں میں کچھ مزدوروں کی حالت نازک بنی ہوئی ہے۔

بتایا جاتا ہے کہ دھماکہ اتنا زوردار تھا کہ اس کی آواز کئی کلومیٹر دور تک سنائی دی اور فیکٹری کے آس پاس کے علاقوں میں دہشت کا ماحول قائم ہو گیا۔ مزدور خوف و دہشت سے اِدھر اُدھر بھاگنے لگے۔ چشم دیدوں کے مطابق دھماکہ کی وجہ سے کئی مزدور 100 میٹر تک دور جا گرے۔ یہ دھماکہ صبح 9 بجے ہوا۔

دھماکہ کی اطلاع ملنے کے بعد فوری طور پر فائر بریگیڈ کی چار گاڑیاں موقع پر پہنچیں۔ اس دوران 108 ایمبولنس اور طبی اہلکار بھی جائے وقوع پر پہنچ گئے۔ زخمیوں کو ٹنچیرو کے اسپتال میں ابتدائی علاج کے لیے لے جایا گیا ہے جہاں سے شدید زخمیوں کو حیدر آباد منتقل کر دیا گیا۔

حادثے کے بعد فیکٹری کی عمارت پوری طرح منہدم ہو گئی۔ ملبے میں مزدوروں کے پھنسے ہونے کا اندیشہ ہے۔ حادثے میں ہلاک مزدوروں کی ابھی سرکاری طور پر تصدیق نہیں ہوسکی ہے۔ انتظامیہ نے فوری کارروائی کرتے ہوئے فیکٹری اور آس پاس کے علاقے کو خالی کروانا شروع کر دیا ہے۔

مقامی لوگوں نے بتایا کہ فیکٹری میں دواؤں کو بنانے میں استعمال ہونے والے پاؤڈر تیار کیے جاتے تھے۔ یہاں مختلف ریاستوں سے آئے 100 سے زیادہ مزدور کام کرتے ہیں۔ حادثے کی خبر ملتے ہی مزدوروں کے اہل خانہ فیکٹری کے باہر جمع ہو گئے۔ انتظامیہ کی طرف سے لوگوں کو جائے وقوع سے دور رہنے کی صلاح دی گئی ہے۔ فی الحال راحت اور بچاؤ کام جاری ہے اور حادثے کی وجوہات کی جانچ شروع کر دی گئی ہے۔