تیجسوی یادو کا نتیش کمار پر بڑا حملہ، کہا- ’مہاگٹھ بندھن میں ان کی واپسی اب کبھی نہیں ہوگی‘

بہار اسمبلی میں اپوزیشن لیڈر اور آر جے ڈی رہنما تیجسوی یادو نے ایک بار پھر نتیش کمار پر سخت حملہ بولا ہے۔ انہوں نے نتیش کمار کے اس بیان کو سرے سے خارج کر دیا، جس میں نتیش کمار نے دعویٰ کیا تھا کہ آج بھی آر جے ڈی سربراہ لالو پرساد یادو انہیں دوبارہ مہاگٹھ بندھن میں شامل کر لیں گے۔ نیوز ایجنسی ’اے این آئی‘ کو دیے گئے ایک انٹرویو میں تیجسوی یادو نے کہا کہ ’’کبھی نہیں، میرے والد ہیں میں جانتا ہوں۔ کسی کی ایک غلطی کے بعد اسے معاف کر دینا ٹھیک ہے۔ لیکن اب انہوں نے وہی غلطی 2 بار کی ہے تو ان کی معافی نہیں بنتی۔‘‘ ساتھ ہی انہوں نے کہا کہ ’’اب نتیش کمار جہاں بھی جائیں گے وہ صرف ایک اضافی بوجھ بن کر رہ جائیں گے۔‘‘

تیجسوی یادو سے جب پوچھا گیا کہ کیا آئندہ بہار اسمبلی انتخاب میں سیٹ کی تقسیم کے سلسلے میں مہاگٹھ بندھن میں کوئی اختلاف ہے۔ اس سوال کے جواب میں انہوں نے کہا ’’یہ اتحاد کا اندرونی معاملہ ہے۔ یہ اچھا ہے کہ لوک سبھا میں اپوزیشن لیڈر راہل گاندھی بہار اسمبلی انتخاب میں کافی سرگرم انتخابی مہم چلا رہے ہیں۔ یہاں تک کہ وزیر اعظم نریندر مودی بھی انتخابی مہم کے لیے آتے ہیں۔‘‘ ساتھ ہی انہوں نے کہا کہ ’’جیتن رام مانجھی نے چراغ پاسوان کے بارے میں کیا کہا؟ اپیندر کشواہا نے کیا کہا؟ ہمیں نہیں لگتا ہے کہ ان کے درمیان سب ٹھیک ہے۔ ہمارے ساتھ ایسا نہیں ہے۔‘‘

تیجسوی یادو نے نتیش کمار کے کام کرنے کے انداز اور رویے پر بھی کئی سنگین سوال اٹھائے۔ انہوں نے کہا کہ نتیش کمار نے میڈیا سے بات کرنا کیوں چھوڑ دیا ہے؟ اگر اسٹیج پر نائب وزیر اعلیٰ یا ان کے افسر موجود ہوتے ہیں تو وہ ان کا ہاتھ کیوں پکڑتے ہیں؟ جب قومی ترانہ بج رہا ہوتا ہے تو وہ اپنے افسران کے پاس جا کر کیوں بات چیت کرنے لگتے ہیں؟ عمر کی اپنی حدود ہوتی ہیں۔ میں اس پر تبصرہ کرنا مناسب نہیں سمجھتا لیکن اب وہ تھک چکے ہیں۔

بہار کے سابق نائب وزیر اعلیٰ نے بہار حکومت کو ہدف تنقید بناتے ہوئے کہا کہ ’’بہار کے لوگوں سے پوچھیے کہ پیپر لیک سب سے زیادہ کب ہوا کرتا تھا؟ 2005 کے بعد یا اس سے قبل؟ بہار میں ایک بھی امتحان کا نام  بتائیے جس میں پیپر لیک نہ ہوا ہو۔ وزیر اعظم مودی سے بہتر اداکار اور جھوٹ بولنے والا شخص اس ملک میں پیدا نہیں ہوا ہے۔‘‘