تمل ناڈو: انتخابات سے عین قبل رائے دہندگان کو ووٹر لسٹ میں نام شامل کرانے کا آج آخری موقع

تمل ناڈو کے اہل شہریوں کے لیے 23 اپریل کو ہونے والے اسمبلی انتخابات سے پہلے ووٹر لسٹ میں اپنا نام درج کرانے کا آخری موقع ہے۔ الیکشن کمیشن نے تمام رائے دہندگان پر زور دیا ہے کہ وہ اس حتمی موقع سے فائدہ اٹھائیں اور جمہوری عمل میں اپنی شرکت کو یقینی بنائیں۔ تمل ناڈو میں ووٹنگ ایک ہی مرحلے میں ہونے جا رہی ہے، جس میں تقریباً 5.67 کروڑ رائے دہندگان حصہ لیں گے۔ انتخابات سے پہلے حکام نے شہریوں سے بار بار اپیل کی ہے کہ وہ اپنے نام ووٹر لسٹ میں درج کرائیں تاکہ پولنگ کے دن کسی قسم کی پریشانی کا سامنا نہ کرنا پڑے۔

الیکشن کمیشن کے مطابق ووٹر لسٹ میں نام شامل کرانے کے لیے درخواست جمع کرانے کی آخری تاریخ 26 مارچ مقرر کی گئی ہے۔ جن لوگوں کا نام ووٹر لسٹ میں نہیں ہے وہ فارم 6 براہ راست متعلقہ الیکٹورل رجسٹریشن آفیسر (ای آراو) کے پاس جمع کرکے یا سرکاری آن لائن پورٹل کے ذریعے درخواست دے سکتے ہیں۔ اس سلسلے میں انتخابی افسران نے بتایا کہ اس نظرثانی مدت کے دوران 3 لاکھ سے زائد درخواستیں موصول ہوئی ہیں، جو عوام کے مسلسل ردعمل کی عکاسی کرتی ہیں۔ اندراج کی مہم زیادہ سے زیادہ رائے دہندگان کی شرکت اور ایک جامع انتخابی عمل کو یقینی بنانے کی کوششوں کا حصہ ہے۔

افسران نے بتایا کہ ووٹر لسٹ میں اپنے نام کی تصدیق کرنا اتنا ہی ضروری ہے جتنا کہ خود ووٹ ڈالنا۔ انہوں نے یہ بھی خبردار کیا کہ مقررہ وقت کے اندررجسٹریشن نہ کرانے پر آئندہ اسمبلی انتخابات میں ووٹ ڈالنے کے موقع سے محروم ہونا پڑسکتا ہے کیونکہ اس میں مزید توسیع کا امکان نہیں ہے۔ رجسٹریشن کی سہولت کے لیے خصوصی انتظامات کیے گئے ہیں جن میں ڈیجیٹل پلیٹ فارم اور مقامی سطح پر انتخابی افسران کے ذریعہ مدد شامل ہے۔

شہریوں کو ان سہولیات سے فائدہ اٹھانے اورعمل کو بلاتاخیر مکمل کرنے کے لیے  حوصلہ افزائی کی گئی ہے۔ آخری تاریخ میں صرف چند گھنٹے باقی رہ جانے کے بعد الیکشن کمیشن نے ایک بار پھر تمام اہل ووٹروں خاص طور پر پہلی بار ووٹ دینے والوں اورحال ہی میں رہائش منتقل کرنے والوں سے جلد سے جلد کارروائی مکمل کرنے کی اپیل کی ہے۔ ریاست کی سب سے اہم جمہوری کاوشوں میں سے ایک میں ووٹ کے حق کا استعمال کرنے کے لیے ووٹر لسٹ میں اپنا نام یقنی بنانا اہم اور ضروری قدم ہہے۔