’تمل ناڈو نے نئی نسل، نئی آواز اور نئی سوچ کا انتخاب کر لیا‘، راہل گاندھی کی نو منتخب وزیر اعلیٰ وجے کو مبارکباد

اداکار سے سیاستداں بنے جوزف وجے نے آج تمل ناڈو کے وزیر اعلیٰ کے عہدے کا حلف اٹھا لیا۔ تمل ناڈو کے گورنر راجندر وشواناتھ آرلیکر نے وجے کو عہدے اور رازداری کا حلف دلایا۔ ان کے ساتھ 9 دیگر وزراء نے بھی حلف اٹھایا۔ اس دوران حلف برداری کی تقریب میں حزب اختلاف کے قائد اور کانگریس رہنما راہل گاندھی سمیت کئی سرکردہ سیاسی لیڈران اور فلمی شخصیات موجود تھیں۔ راہل گاندھی آج صبح ہی اس تقریب میں شرکت کے لیے چنئی پہنچ گئے تھے۔

کانگریس رہنما راہل گاندھی نے سوشل میڈیا پلیٹ فارم ’ایکس‘ پر جوزف وجے کی حلف برداری تقاریب کی کئی تصاویر شیئر کیں۔ ایک تصویر میں راہل گاندھی اور نومنتخب وزیر اعلیٰ جوزف سیلفی لیتے ہوئے نظر آ رہے ہیں۔ راہل گاندھی نے کیپشن میں لکھا کہ ’’تمل ناڈو نے انتخاب کر لیا ہے۔ ایک نئی نسل۔ ایک نئی آواز۔ ایک نئی سوچ۔ میری نیک تمنائیں تھیرو وجے کے لیے - دعا ہے کہ وہ تمل ناڈو کے عوام کی امیدوں پر پورا اتریں۔‘‘

راہل گاندھی کے علاوہ کانگریس کے قومی صدر ملکارجن کھڑگے نے بھی تمل ناڈو کے نومنتخب وزیر اعلیٰ کو مبارکباد پیش کی۔ انہوں نے سوشل میڈیا پلیٹ فارم ’ایکس‘ پر لکھا کہ ’’تمل ناڈو کے وزیر اعلیٰ کے طور پر تھیرو ٹی وی کے وجے کی حلف برداری کے موقع پر، میں انہیں، تملگا ویٹری کزگم پارٹی اور پورے ترقی پسند اتحاد کو دلی مبارکباد اور نیک خواہشات پیش کرتا ہوں۔‘‘ وہ مزید لکھتے ہیں کہ ’’اس حکومت کی تشکیل خودداری، سماجی انصاف، بااختیاری اور حقیقت پسندی کی ان پائیدار اقدار کی دوبارہ توثیق کرتی ہے، جو طویل عرصے سے تمل ناڈو کے سیاسی اور سماجی شعور کی پہچان رہی ہیں۔ یہ وہ ورثہ ہے جسے پیریار اور کامراجر نے تشکیل دیا۔‘‘

ملکارجن کھڑگے ’ایکس‘ پر مزید لکھتے ہیں کہ ’’تمل ناڈو کے لاکھوں لوگوں، خصوصاً باصلاحیت اور پُرامید نوجوانوں نے ٹی وی کے پر اپنا اعتماد ظاہر کیا ہے۔ مجھے یقین ہے کہ ان کی قیادت میں یہ نظریات حکمرانی کی رہنمائی کرتے رہیں گے اور پورے ملک کے لیے باعث تحریک بنیں گے۔ نئی حکومت کے لیے میری دعا ہے کہ وہ ہمدردی، شمولیت اور عزم کے ساتھ عوام کی خدمت میں عظیم کامیابی حاصل کرے۔‘‘

قابل ذکر ہے کہ تمل ناڈو اسمبلی انتخاب میں وجے کی پارٹی کو 108 سیٹیں ملی تھیں، جبکہ حکومت بنانے کے لیے 118 سیٹوں کی ضرورت تھی، جس کی وجہ سے کئی دنوں تک سیاسی ہلچل مچی رہی۔ کانگریس نے پہلے ہی حمایت دے دی تھی اس کے بعد دیگر پارٹیوں نے بھی وجے کی حمایت کر دی۔ اِس وقت وجے کی پارٹی ’ٹی وی کے‘ کو کانگریس کے 5 اراکین اسمبلی اور سی پی آئی، سی پی آئی ایم، وی سی کے سمیت آئی یو ایم ایل کے 2-2 اراکین اسمبلی کی حمایت حاصل ہے۔ یہ تمام جماعتیں ڈی ایم کے کی قیادت والے سیکولر پروگریسو الائنس (ایس پی اے) کا حصہ بن کر الیکشن لڑی تھیں۔