بیلگاوی: سرجے والا نے ’جے باپو، جے بھیم، جے آئین‘ ریلی کا مقصد بیان کیا، بی جے پی پر نشانہ

بیلگاوی: کانگریس کے جنرل سکریٹری رندیپ سنگھ سرجے والا نے جمعہ کو کرناٹک کے سانبرا ایئرپورٹ پر میڈیا سے گفتگو کرتے ہوئے اعلان کیا کہ کانگریس 21 جنوری سے ’جے باپو، جے بھیم، جے سمویدھان (آئین)' ریلی منعقد کرے گی۔

انہوں نے کہا کہ بیلگام (بیلگاوی) کی تاریخی سرزمین اور کانگریس کا رشتہ دہائیوں پر محیط ہے۔ 21 جنوری کو ایک بار پھر بیلگام میں ریلی ہوگی جس میں راہل گاندھی، کانگریس صدر ملکارجن کھڑگے، پرینکا گاندھی اور دیگر کانگریسی قائدین شریک ہوں گے۔

سرجے والا نے کہا کہ یہ ریلی 17 دسمبر 2024 کو وزیر داخلہ امت شاہ کے پارلیمنٹ میں دیے گئے بیان کے ردعمل میں منعقد کی جا رہی ہی، جس میں انہوں نے بابا صاحب امبیڈکر کی توہین کی اور ان کے نظریات کے حامیوں کا مذاق اڑایا۔

سرجے والا نے الزام لگایا کہ بی جے پی بار بار آئین اور عوامی حقوق پر حملے کر رہی ہے۔ ملک میں امیروں اور غریبوں کے درمیان خلیج ناقابل پر ہو چکی ہے۔

انہوں نے کہا کہ بی جے پی آئینی حقوق کو بلڈوزر کے نیچے کچل رہی ہے۔ اسی لیے 21 جنوری کو بیلگام اور 27 جنوری کو بابا صاحب کے جائے پیدائش مئو، مدھیہ پردیش میں ریلی کا انعقاد کیا جا رہا ہے۔

انہوں نے مزید کہا کہ ایک طرف بی جے پی بابا صاحب کی توہین کرتی ہے، دوسری طرف دلتوں، پسماندہ طبقات، قبائلیوں، خواتین اور نوجوانوں کے حقوق چھینتی ہے۔ اب وقت آ گیا ہے کہ مہاتما گاندھی اور بابا صاحب کے نظریات پر چلتے ہوئے ایک نئی تحریک شروع کی جائے۔ بیلگام سے اٹھنے والی آواز سیاست کو نئی سمت دے گی۔