سی بی آئی بحران: چارج سنبھالنے کے 3 دن بعد سپریم کورٹ نے ناگیشور کے پر کترے

سی بی آئی کے ڈاریکٹر آلوک ورما کی عرضی پر چیف جسٹس آف انڈیا رنجن گوگوئی نے حکم دیا ہے کہ سی وی سی (سینٹرل وجیلینس کمیشن) کی نگرانی میں سپریم کورٹ کے ریٹائرڈ جج اے کے پٹنائک کی قیادت میں اس پورے معاملہ کی دو ہفتے کے اندر جانچ کرائی جائے۔

سی بی آئی کے ڈاریکٹر آلوک ورما نے سی وی سی اور حکومت کے اس فیصلہ کو سپریم کورٹ میں چیلنج کیا تھا جس کے تحت انہیں 24 اکتوبر کی آدھی رات کو چھٹی پر بھیج دیا گیا تھا اور ان کی جگہ اسپیشل ڈاریکٹر ایم ناگیشور کو سی بی آئی کا کارگزار ڈاریکڑ بنا دیا گیا تھا۔

آلوک ورما کی جانب سے فالی ناریمن نے کیس پیش کرتے ہوئے کہا کہ آلوک ورما کو چھٹی پر بھیجنا بنیادی طور پر قانون کی خلاف ورزی ہے ۔ اس پر چیف جسٹس آف انڈیا رنجن گوگوئی نے کہا کہ آلوک ورما اور راکیش استھانا کے معاملہ کی سی وی سی کی نگرانی میں سپریم کورٹ کے جج کی قیادت میں جانچ کرائی جائے اور یہ جانچ دس دن کے اندر مکمل کی جائے ۔

جانچ کے بعد سپریم کورٹ اپنا اگلا فیصلہ سنائے گی اور اس وقت تک کارگزار ڈاریکٹر ایم ناگیشور صرف روٹین کے کام دیکھیں گے اور کوئی پالیسی سے متعلق فیصلہ نہیں لیں گے ۔ اس پر اٹارنی جنرل تشار مہتا نے عدالت سے کہا کہ اس جانچ کے لئے دس دن کا وقت بہت کم ہے اور سپریم کورٹ کے جج کی قیادت میں اس معاملہ کی جانچ نہیں ہونی چاہئے ۔ اس پر رنجن گوگوئی نے اپنے فیصلہ میں دس روز کی جگہ دو ہفتے کر دیا اور سپریم کورٹ کے ریٹائرڈ جج اے کے پٹنائک کی قیادت میں اس جانچ کا حکم دیا اور اگلی سنوائی کی تاریخ 12 نومبر طے کر دی ۔ یعنی اس معاملہ پر اب جو بھی کچھ ہوگا وہ دیوالی کے بعد ہی ہوگا۔