غیر رہائشی ہندوستانیوں کو ووٹنگ کا حق دینے کی حمایت، پارلیمانی کمیٹی کی سفارش

ایک اعلیٰ سطح کی پارلیمانی کمیٹی نے غیر رہائشی ہندوستانیوں (این آر آئی) کو ووٹنگ کا حق دینے کی تجویز کی حمایت کی ہے۔ کمیٹی نے اس کے لیے پراکسی ووٹنگ اور الیکٹرونک بیلٹ (ای۔بیلٹ) جیسے متبادل کی سفارش کی ہے تاکہ غیر ملکوں میں رہنے والے ہندوستانی شہری بھی جمہوری عمل میں حصہ لے سکیں۔ کمیٹی نے یہ بھی ذکر کیا ہے کہ یہ معاملہ حال میں وزارت قانون کے پاس زیر التوا ہے۔

کانگریس رہنما ششی تھرور کی صدارت والی خارجہ امور کی پارلیمانی کمیٹی نے جمعرات کو غیر مقیم ہندوستانیوں پر اپنی رپورٹ پارلیمنٹ میں پیش کرنے کا منصوبہ بنایا ہے۔ اس رپورٹ میں 'این آر آئی' کی تعریف کو واضح کرنے کی ضرورت پر زور دیا گیا ہے کیونکہ مختلف قوانین میں اس لفظ کا الگ الگ استعمال کیا جاتا ہے۔

رپورٹ میں کمیٹی نے کہا ہے کہ موجودہ ضابطوں کے تحت این آر آئی کو ووٹنگ فہرست میں نام درج کرانے کے باوجود ہندوستان میں جسمانی طور پر موجود رہ کر ہی ووٹنگ کرنی پڑتی ہے۔ کمیٹی نے تشویش ظاہر کی کہ بڑی تعداد میں این آر آئی ہندوستانی شہریت چھوڑ چکے ہیں یا دوہری شہریت رکھتے ہیں، جس سے انتخابی عمل میں ان کی حصہ داری محدود ہو گئی ہے۔

حالانکہ این آر آئی کے ووٹنگ کے حق کا معاملہ ابھی وزارت قانون کے جائزہ میں ہے، لیکن کمیٹی نے وزارت خارجہ سے گزارش کی ہے کہ وہ اس معاملے کو وزارت قانون اور انتخابی کمیشن کے ساتھ فعال طور سے آگے بڑھائے۔ کمیٹی نے پراکسی ووٹنگ اور الیکٹرونک طور سے سینٹ پوستل بیلٹ سسٹم (ای ٹی پی بی ایس) جیسے ممکنہ مسائل کے حل کا سجھاؤ دیا ہے۔ لیکن اس کے لیے 1950 کے عوامی نمائندگان ضابطہ میں ترمیم کی ضرورت ہوگی اور سیاسی پارٹیوں سے وسیع پیمانے پر بات چیت ضرور ہوگی۔