سوشل میڈیا نے لے لی 12 سالہ بچے کی جان

سوشل میڈیا موجودہ دور میں ہر چھوٹے و بڑے کی عادت بن چکا ہے۔ کئی بار اس کی شدید عادت کا منفی اثر لوگوں پر پڑتا ہوا بھی دیکھا گیا ہے۔ سب سے زیادہ افسوس تو اس وقت ہوتا ہے جب کم عمر بچے سوشل میڈیا پر وائرل ہو رہے خطرناک ویڈیو کی نقل کرنے کی کوشش کرتے ہیں اور اس سے ان کی جان کو بھی خطرہ لاحق ہو جاتا ہے۔ کچھ ایسا ہی معاملہ کیرالہ کے ترووننت پورم میں پیش آیا ہے جو دل دہلا دینے والا ہے۔

میڈیا ذرائع سے موصول ہو رہی خبروں کے مطابق ایک 12 سالہ لڑکے نے سوشل میڈیا پر پوسٹ ایک ویڈیو کی نقل کرنے کی کوشش کی اور انجانے میں موت کی نیند سو گیا۔ دراصل اس لڑکے کو سوشل میڈیا کی عادت پڑ گئی تھی اور اکثر سوشل میڈیا پر وائرل ہونے والی ویڈیوز دیکھا کرتا تھا۔ خصوصی طور پر وہ ایسے ویڈیوز دیکھتا تھا جس میں بالوں کو آگ سے اسٹریٹ کیا جاتا تھا۔ ایک دن اس نے بھی اپنے بال آگ سے اسٹریٹ کرنے کی کوشش کی جس سے وہ آگ میں جھلس گیا۔

موصولہ اطلاعات کے مطابق حادثے کا شکار لڑکا ساتویں درجہ میں پڑھتا تھا۔ اس کا نام شیونارائن تھا۔ اسے سوشل میڈیا پر ویڈیو دیکھنا بہت پسند تھا۔ جس دن حادثہ ہوا اس دن گھر پر لڑکے کی دادی کے علاوہ کوئی نہیں تھا۔ لڑکے نے باتھ روم میں جا کر اپنے بالوں کو اسٹریٹ کرنے کے لیے اس پر کیروسین لگایا، پھر جیسے ہی آگ جلائی، اس نے بچے کو اپنی زد میں لے لیا۔

اس واقعہ کے تعلق سے پولس کا جو بیان سامنے آیا ہے اس میں بتایا گیا ہے کہ مبینہ طور سے 12 سالہ لڑکے کی موت آگ میں جلنے سے ہوئی ہے۔ پولس کے مطابق یہ حادثہ اس لیے ہوا کیونکہ وہ سوشل میڈیا پلیٹ فارم پر ویڈیو دیکھتا تھا اور بچے نے ویسا ہی اپنے ساتھ کرنے کی کوشش کی۔ اس دوران حادثہ ہو گیا اور اس کی جان چلی گئی۔