عصمت دری کے ملزم سوامی چنمیا نند سے ایس آئی ٹی کی پوچھ گچھ

شاہجہانپور: شاہجہاں پور کے ہائی پروفائل معاملے میں ایس آئی ٹی نے سنیچر کو سابق مرکزی وزیر سوامی چنمیانند رہائش گاہ ومکش آسرم پہنچ کر ان سے ضمن میں تفصیل پوچھ گچھ کی اور ان کا بیان درج کیا۔

آفیشیل ذرائع کے مطابق ایس آئی ٹی ٹیم سنیچر کو سوامی شکدیوانند لاء کالج پہنچی اور کالج انتظامیہ سے مختلف معلومات حاصل کیں۔جانچ ٹیم متأثرہ لڑکی کے ہاسٹل بھی گئی جس کمرے میں متأثرہ رہتی تھی اس کمرے کا بھی ٹیم نے کافی باریکی سےمعائنہ کیا۔کالج سے نکلنے کے بعد جانچ ٹیم سیدھے سوامی چنمیانند کی رہائش گاہ پہنچی۔جہاں ٹیم کے اراکین نے الگ الگ نکات پر تقریب ڈیڑھ گھنٹے پوچھ گچھ کی اور ان کے بیانات درج کئے۔

قابل ذکر ہے کہ سوامی شکدیوا نند لاء کالج کی ایک طالبہ نے فیس بک پر 24 اگست کو ایک ویڈیو اپلوڈ کیا تھا۔ اپنی ویڈیو میں طالبہ نے ایک ’سوامی‘ کے ذریعہ کئی لڑکیوں کی زندگی برباد کرنے کا الزام لگاتے ہوئے اہل خانہ کے جان کو خطر ہ بتایا تھا۔اس کے بعد سے وہ طالبہ غائب ہوگئی تھی۔

طالبہ کے والد نے شہر کوتوالی میں 72 سالہ سوامی چنمیا نند کے خلاف بیٹی کے اغوا کرنے اور جان سے مانے کی دھمکی کا مقدمہ درج کرایا تھا۔ بعد میں یہ معاملہ مفاد عامہ کی ایک عرضی کے تحت سپریم کورٹ میں پہنچ گیا اور عدالت نے ریاستی حکومت کو ایس آئی ٹی کے ذریعہ معاملے کی تفتیش کرانے کا حکم دیا تھا۔

ریاستی حکومت نے آئی جی نوین اروڑا کی قیادت میں ایس آئی ٹی تشکیل کی۔جانچ ٹیم نے جمعہ سے ہی شاہجہاں پور میں معاملے کی پڑتال کررہی ہے۔ پہلے دن جمعہ کو ایس آئی ٹی نے شاہجہاں پور کے پولیس افسران کے ساتھ میٹنگ کر کے معاملے کی جانکاری لینے کے بعد اس سے متعلق تمام دستاویزات کو اپنے قبضے میں لے لیا تھا۔