سدارمیا نے ’چنّاسوامی اسٹیڈیم بھگدڑ‘ پر بحث کے دوران بی جے پی حکمراں ریاستوں کے 20 بھگدڑ واقعات کا کیا ذکر

کرناٹک کے وزیر اعلیٰ سدارمیا نے جمعہ کے روز بی جے پی حکمراں ریاستوں میں پیش آئے 20 بھگدڑ واقعات کا ذکر کرتے ہوئے بتایا کہ ایسے حادثات کے لیے اجتماعی جنون ذمہ دار ہوتے ہیں۔ یہ بات انھوں نے رواں سال 4 جون کو چنّاسوامی اسٹیڈیم کے پاس ہوئے بھگدڑ واقعہ پر کرناٹک اسمبلی میں ہوئی بحث کے دوران کہی۔ اس بھگدڑ واقعہ میں 11 لوگوں کی جان چلی گئی تھی۔

ایوان میں وزیر اعلیٰ نے بی جے پی حکمراں ریاستوں میں ہوئے بھگدڑ واقعات کی پوری فہرست پیش کر دی۔ اس فہرست میں 3 اگست 2008 کو ہماچل پردیش کے بلاسپور ضلع واقع نینا دیوی مندر میں ہوا بھگدڑ واقعہ بھی شامل تھا، جب پریم سنگھ دھومل وزیر اعلیٰ تھے۔ اس کے بعد 2008 میں جودھپور میں ہوئے بھگدڑ واقعہ کا ذکر آیا، جس میں 250 افراد جاں بحق ہوئے تھے۔ انھوں نے جن بھگدڑ واقعات کا ذکر کیا، ان میں 2013 میں رتن گڑھ، 2021 میں ہریدوار، 2023 میں مدھیہ پردیش واقع سیہور اور 2024 میں اتر پردیش کے ہاتھرس میں ہوا بھگدڑ واقعہ شامل ہے، جس میں 121 لوگ مارے گئے تھے۔

وزیر اعلیٰ سدارمیا نے رواں سال جنوری ماہ میں کمبھ میلہ کے دوران پریاگ راج میں ہوئی بھگدڑ کا ذکر بھی ایوان میں کیا۔ اس بھگدڑ واقعہ میں 39 لوگوں کی جان چلی گئی تھی۔ وزیر اعلیٰ نے 2022 میں گجرات کے موربی میں پیش آئے پُل حادثے کا بھی ذکر کیا جس میں تقریباً 135 لوگوں کی موت ہو گئی تھی۔ وزیر اعلیٰ نے کہا کہ ’’میری 42 سالہ سیاسی زندگی میں ایسا (چنّاسوامی اسٹیڈیم جیسا) واقعہ کبھی نہیں ہوا۔ میں نے کبھی بھگدڑ میں 11 لوگوں کو مرتے نہیں دیکھا۔ مجھے بہت افسوس ہوا ہے۔ میں نے اسی دن اپنا غم ظاہر کیا تھا۔‘‘

بنگلورو بھگدڑ سے متعلق بات کرتے ہوئے وزیر اعلیٰ نے کہا کہ لوگوں نے آئی پی ایل میچ میں آر سی بی کی جیت کو بنگلورو کا فخر تصور کیا۔ اس سے پیدا عوامی جنون ہی بھگدڑ کے پیچھے کی وجہ تھی۔ سدارمیا نے کہا کہ ’’جمہوریت میں ہمیں کبھی کبھی لوگوں کی امیدوں کے آگے جھکنا پڑتا ہے۔ یہی جمہوریت کی نشانی ہے۔‘‘

اس سے قبل وزیر داخلہ جی پرمیشور نے اسمبلی میں بنگلورو بھگدڑ پر اپنی بات رکھی۔ انھوں نے کہا کہ ’’بھگدڑ میں 11 لوگوں کی جان چلی گئی تھی۔ ہم نے پولیس افسران کو معطل کر دیا اور ریٹائرڈ سپریم کورٹ جج، جسٹس جان مائیکل ڈی کنہا سے بھگدڑ پر رپورٹ منگوائی۔‘‘ انھوں نے کہا کہ ہم بھگدڑ میں گئی جانوں کو واپس تو نہیں لا سکتے، لیکن ہم بھیڑ مینجمنٹ بل لے کر آئے ہیں۔