دہلی ہائی کورٹ نے امانت اللہ خان کو سنائی بری خبر، ’بیڈ کیریکٹر‘ کا ٹیگ ہٹانے کی عرضی خارج

دہلی ہائی کورٹ نے جمعرات کو عآپ رکن اسمبلی امانت اللہ خان کی اس عرضی کو خارج کرنے کا فیصلہ سنایا جس میں انھوں نے ’بیڈ کیریکٹر‘ (خراب کردار) ٹھہرائے جانے کے دہلی پولیس کے فیصلے کو چیلنج پیش کیا تھا۔ حالانکہ جسٹس سدھیر کمار جین کی سنگل جج بنچ نے امانت اللہ خان کو چھوٹ دی ہے کہ وہ اعلانیہ مجرم قرار دیئے جانے کے خلاف پولیس کو عرضداشت دے سکتے ہیں۔

دہلی ہائی کورٹ میں امانت اللہ خان کی نمائندگی کرتے ہوئے ایڈووکیٹ ایم صوفیان صدیقی نے دلیل پیش کی کہ ہسٹری شیٹ کھولنے کے وقت قانون کے مطابق پولیس افسر کو وجہ بتانا چاہیے تھا، لیکن امانت اللہ خان کے معاملے میں اصول پر عمل نہیں کیا گیا اور انھیں خراب کردار کی شکل میں فہرست بند کیا گیا۔ انھوں نے یہ بھی اعتراض ظاہر کیا کہ جن چیزوں کو راز میں رکھانا چاہیے، پولیس نے ان کی جانکاری میڈیا کو دی۔ صوفیان صدیقی نے کہا کہ ’’جانکاریوں کو مجھے بھیجے جانے سے پہلے میڈیا میں لیک کر دی گئیں۔ یہ سبھی اخبارات میں شائع ہوئیں۔ یہ آرٹیکل 21 میں موجود حقوق کی مکمل خلاف ورزی ہے۔‘‘

صوفیان صدیقی کا کہنا ہے کہ ڈی سی پی ہیڈکوارٹر کے ذریعہ جاری ان کے خود کے سرکلر کے مطابق یہ لازمی ہے کہ متعلقہ ڈی سی پی کو ان وجوہات کو درج کرنا ہوگا جہاں کوئی سزا نہیں ہے۔ اس پر دہلی پولیس کے وکیل نے دلیل دی کہ ان کی طرف سے کچھ بھی لیک نہیں کیا گیا تھا۔ وکیل نے بتایا کہ وہ (امانت اللہ) ایک سیاسی شخصیت ہیں۔ ہو سکتا ہے کہ انھوں نے اسے خود لیک کیا ہو۔ ہم نے کچھ بھی لیک نہیں کیا ہے۔ ان کے خلاف 16 ایف آئی آر درج ہیں۔ پھر امانت اللہ خان کے وکیل نے کہا کہ متعلقہ اسٹیشن ہاؤس افسر نے اپنے موکل کے خلاف الزامات کو ثابت کرنے کے لیے بغیر کسی مواد یا بنیاد کے بری نیت سے کارروائی کی ہے۔