’شیلا دیکشت دہلی کی ترقی اور سیکولر اقدار کیلئے ہمیشہ یاد رکھی جائیں گی‘

نئی دہلی: شیلا دیکشت بلند عزائم، حوصلہ مند اور سیکولر اقدار کی حامل عظیم خاتون سیاست داں تھی۔ دہلی کی تعمیر وترقی اور اس کی خوبصورتی میں ان کا کردار ناقابل فراموش ہے۔ ان کے انتقال سے سیاست میں غیر معمولی خلاپیدا ہوگیا ہے اور کانگریس سمیت پورے ملک کیلئے ایک ناقابل تلافی نقصان ہے۔ ان خیالات کا اظہار آل انڈیا ملی کونسل کے جنرل سکریٹری ڈاکٹر محمد منظور عالم نے کیا۔

دہلی کی سابق وزیر اعلی آنجہانی شیلادیکشت کے انتقال پر شدید رنج وغم کا اظہار کرتے ہوئے ڈاکٹر محمد منظور عالم نے کہاکہ شیلاد یکشت ایک ایماندار،محنتی اور بلند اخلاق کی پیکر سیاست داں تھے۔ تین مرتبہ مسلسل انہیں عوام نے منتخب کیا اور وزیر اعلی رہتے ہوئے دہلی کی ہمہ جہت ترقی میں انہوں نے نمایاکردار نبھایا۔

آج دہلی کو بلند ترین عمارت،گرین سٹی، خوبصورتی، اوو ر بریج، کشادہ سڑکیں سمیت کئی اعتبار سے عالمی سطح پر خصوصیت اور امتیاز حاصل ہے جس کا سہرا انہیں کے سرجاتاہے۔ انہوں نے اپنے دور اقتدار میں کسی بھی طرح کے مذہبی بھید بھاوسے گریز کیا۔ سب کو ساتھ لیکر چلنے کا کام کیا،کسی طرح کا فرقہ وارانہ فساد اور ہنگامہ نہیں ہوا۔ یہی وجہ ہے کہ شیلا دیکشت کو دہلی کی سب سے چہتی وزیر اعلی مانا جاتا ہے۔

ڈاکٹر محمد منظور عالم نے کہاکہ ملی اداروں اور مسلمانوں کے ساتھ بھی شیلا دیکشت کے گہرا ر وابط اور اچھے تعلقات تھے۔ انسٹی ٹیوٹ آف آبجیکٹو اسٹڈیز اور آل انڈیا ملی کونسل کے بیشتر پروگرام میں ان کی شرکت رہی۔