مہاراشٹر کے وزیر نتیش رانے کے بنگلے کے باہر مشتبہ بیگ ملنے سے سنسنی

مہاراشٹر کے بی جے پی لیڈر اور ریاستی وزیر نتیش رانے کی سرکاری رہائش گاہ ’سوورن گڈ‘ بنگلے کے باہر اتوار کو ایک مشتبہ بیگ ملنے سے کھلبلی مچ گئی۔ ابتدائی معلومات کے مطابق ایک نامعلوم شخص بنگلے کے باہر بیگ رکھ کرموقع سے چلا گیا تھا۔ بیگ دکھائی دینے کے فوری بعد پولیس اور تفتیشی ایجنسیوں کو اس کی اطلاع دی گئی۔ کچھ ہی دیر میں ممبئی پولیس کے سینئرافسران اور بم ڈسپوزل اسکواڈ جائے وقوعہ پر پہنچ گئے اورپورے علاقے کا محاصرہ کرکے بیگ کی گہرائی سے جانچ شروع کی گئی۔ اس دوران آس پاس کی آمد ورفت پر احتیاطاً نظر رکھی گئی۔

’اے بی پی‘ نیوز کے مطابق ممبئی پولیس کے سینئرافسرنے بتایا کہ مشتبہ بیگ کی جانب جانچ کی گئی تواس میں کسی بھی طرح کا دھماکہ خیز مواد یا خطرناک سامان نہیں پایا گیا۔ بیگ کے اندر سے ایک خط اور بڑی تعداد میں جوتے ملے ہیں۔ پولیس نے بتایا کہ خط میں لکھا تھا کہ ’’جس کو بھی جوتے چاہیے، مفت لے لو‘‘۔ بیگ میں مختلف قسم کے کئی جوتے رکھے ہوئے تھے، لیکن کوئی ایسا کیوں کرے گا؟ ، یہ سوال اب لوگوں کو پریشان کررہا ہے۔ وہیں لوگوں کا کہنا ہے کہ بیگ میں اگر دھماکہ خیز ہوتا تو کیا ہوتا؟

اس دوران سامنے آئی سی سی ٹی وی فوٹیج میں ایک شخص دیکھائی دے رہا ہے جو بیگ کو بنگلے کے باہر رکھ کر وہاں سے چلا گیا۔ پولیس فی الحال اس شخص کی شناخت اور تلاش کرنے میں مصروف ہے۔ حکام کا کہنا ہے کہ بیگ کی جانچ پڑتال کے بعد کوئی مشکوک یا قابل اعتراض چیز نہیں ملی۔ پولیس تمام زاویوں سے معاملے کی جانچ کر رہی ہے۔ پولیس کے افسران یہ جاننے کی کوشش کر رہے ہیں کہ آخر بیگ وہاں کیوں رکھا گیا اور اس کے پس پشت شخص کا ارادہ کیا تھا۔ دریں اثنا، نتیش رانے نے ابھی تک اس معاملے پر کوئی تبصرہ نہیں کیا ہے۔